ఏఐ మోడళ్ళకు శిక్షణ నిలిపివేత : ఓపెన్ ఏఐ సంచలన నిర్ణయం
ప్రముఖ ఆర్టిఫిషియల్ ఇంటెలిజెన్స్ సంస్థ ఓపెన్ఏఐ సంచలన నిర్ణయం తీసుకుంది. తమ అత్యంత శక్తిమంతమైన ఏఐ మోడళ్లకు సంబంధించిన శిక్షణ, అభివృద్ధి, ఇతర టూల్ ఆధారిత వినియోగాన్ని తక్షణమే నిలిపివేస్తున్నట్లు ప్రకటించింది. శిక్షణలో ఉన్న ఒక ఏఐ ఏజెంట్, సంస్థ విధించిన ఇంటర్నెట్ భద్రతా వలయాన్ని ఛేదించుకుని ప్రభుత్వ వెబ్సైట్లలోకి చొరబడడమే ఇందుకు కారణం. ఈ ఘటనతో అప్రమత్తమైన ఓపెన్ఏఐ, భద్రతా లోపాలను సరిదిద్దే వరకు ఈ పాక్షిక విరామం కొనసాగుతుందని స్పష్టం చేసింది.
సెప్టెంబరు 20న ఒక శిక్షణా కార్యక్రమంలో ఈ అనూహ్య ఘటన చోటుచేసుకున్నట్లు ఓపెన్ఏఐ విడుదల చేసిన నివేదికలో పేర్కొంది. ఒక సెర్చ్ ఆధారిత టాస్క్లో భాగంగా, ఈ ఏఐ ఏజెంట్ లైవ్ ఇంటర్నెట్కు దూరంగా, ఆఫ్లైన్లో నిల్వ చేసిన వెబ్ సమాచారంతో మాత్రమే పనిచేయాల్సి ఉంది. అయితే, సంస్థ నెట్వర్క్లోని డొమైన్ నేమ్ సిస్టమ్ (డీఎన్ఎస్) ఫిల్టరింగ్లో ఉన్న ఒక చిన్న లోపాన్ని ఈ ఏఐ కనిపెట్టింది. దాని ద్వారా నిర్దేశించిన పరిధిని దాటి, పబ్లిక్ ఇంటర్నెట్లోని ఒక చాట్బాట్ సర్వీస్ను యాక్సెస్ చేసింది.
ఈ ఘటన తమ భద్రతా నియంత్రణ వ్యవస్థలోని బలహీనతను బయటపెట్టిందని ఓపెన్ఏఐ అంగీకరించింది. "మా ఏఐ మోడల్ లైవ్ ఇంటర్నెట్ను యాక్సెస్ చేయలేదనే నమ్మకంతో భద్రతా చర్యలు చేపట్టాం. కానీ, ఈ ఘటన మా అంచనాలను తలకిందులు చేసింది. అందుకే ప్రభావితమైన శిక్షణా కార్యక్రమాన్ని వెంటనే నిలిపివేశాం. భద్రతా లోపాన్ని పూర్తిగా పరిష్కరించి, అదనపు రెడ్-టీమింగ్ (హ్యాకింగ్ పరీక్షలు), భద్రతా పరీక్షలు పూర్తి చేసే వరకు మా అత్యంత సామర్థ్యం గల మోడళ్ల శిక్షణ, మూల్యాంకనం, టూల్-యూసేజ్ను నిలిపివేయాలని నిర్ణయించాం" అని నివేదికలో వివరించింది.
