ఛత్తీస్గఢ్ హార్రర్ : మహిళను దగ్గరుండి గ్యాంగ్ రేప్ చేయించిన పోలీస్...
అత్యాచారాలపై ఎన్ని చట్టాలు చేసినప్పటికీ మహిళలకు రక్షణ లేకుండా పోతుంది. ఛత్తీస్గఢ్ రాష్ట్రంలో తాజాగా మరో దారుణం జరిగింది. ఓ మహిళ సామూహిక అత్యాచారానికి గురైంది. ఈ కామాంధుల ముఠాలో ఓ పోలీస్ కూడా ఉండటం గమనార్హం. ఈ కేసులో పోలీస్ దగ్గరుండి గ్యాంగ్ రేప్ చేయించాడు. ఈ దారుణానికి పాల్పడిన కామాంధుల్లో ఒక ఉపాధ్యాయుడు, ఒక ప్రభుత్వ ఉద్యోగి ఉన్నాడు.
తాజాగా వెలుగులోకి వచ్చిన ఈ వివరాలను పరిశీలిస్తే, రాయ్‌పూర్‌కు చెందిన ఓ మహిళపై పోలీస్, ప్రభుత్వ అధికారి, ఒక ఉపాధ్యాయుడు కలిసి అత్యాచారానికి పాల్పడ్డారు. ఆ మహిళపై అత్యాచారం చేయడమేకాకుండా ఆ సమయంలో వీడియో తీసి మహిళపై బెదిరింపులు చేశారు.
ఈ విషయం బయటికి చెబితే వీడియో సోషల్ మీడియాలో పెడతామని బెదిరించారు. అంతటితో ఆగకుండా బాధితురాలి కూతురిపై కూడా అత్యాచారం చేస్తామని బెదిరించారు. దీంతో దిక్కుతోచని స్థితిలో దు:ఖాన్ని గొంతులోనే బిగపట్టుకుని ఉంది బాధితురాలు.
ఆ తర్వాత నుంచి ఆ కామాంధుల ఆగడాలు హెచ్చుమీరిపోయాయి. ప్రతి రోజూ ఆ మహిళను వేధించసాగారు. దీంతో వేధింపులు భరించలేని ఆ బాధితురాలు నాలుగు నెలల తర్వాత పోలీస్ స్టేషన్ గడపతొక్కి, తనకు జరిగిన అన్యాయాన్ని బోరున విలపిస్తూ చెప్పింది. బాధితురాలు ఇచ్చిన లిఖిత ఫిర్యాదు తీసుకున్న పోలీసులు.. కేసు దర్యాప్తు చేస్తున్నట్లు తెలిపారు.
