అధికారం లేక నిద్ర పట్టడం లేదా? - భారసాకు బండ్ల గణేశ్ కౌంటర్
తెలంగాణాలో అధికారం కోల్పోయిన భారత రాష్ట్ర సమితికి సినీ నిర్మాత బండ్ల గణేశ్ తేరుకోలేని కౌంటర్ ఇచ్చారు. అధికారం లేక నిద్రపట్టడం లేదా అంటూ విమర్శించారు. గత పాలకులు అంటూ ఎంత కాలం చెబుతారు... పదేళ్లలో మీ ప్రభుత్వం ఏం చేసిందో చెప్పండి...! కాంగ్రెస్‌ అధికారం చేపడితే.. మీకు నిద్ర పట్టడం లేదా? అంటూ సూటిగా ప్రశ్నించారు.
పవర్‌ లేని వాళ్లకు పవర్‌ పాయింట్‌ ప్రెజెంటేషన్‌ ఎందుకు సార్‌.. అంటూ భారస నేతలను విమర్శిస్తూ సామాజిక మాధ్యమాల్లో ఆదివారం ఆయన ఓ వీడియోను విడుదల చేశారు. ప్రజాస్వామ్యం గొప్పది. మీరు బాగా చేయలేదని మాకు అధికారం ఇచ్చారు. కాంగ్రెస్‌ వచ్చి నెల రోజులు కూడా కాలేదు. ఆగండి.. ఓపిక పట్టండి. నిద్ర వస్త లేదా?
మీరు చేసిన తప్పులు బయటకు వస్తాయని భయపడుతున్నారా? అని ఆయన నిలదీశారు. కాంగ్రెస్‌ ప్రభుత్వం అద్భుతంగా పనిచేస్తుందనా? ముఖ్యమంత్రి, మంత్రులు ప్రజలకు అందుబాటులో ఉన్నారనా? అనుక్షణం అందరికీ న్యాయం చేస్తున్నారనా? ప్రజలు సుఖ సంతోషాలతో కళకళలాడుతున్నారనా? ఎందుకు మీకు తొందర.. ఆగండంటూ హితవు పలికారు.
