బ్రాండ్ అంబాసిడర్ నుంచి తప్పుకున్న దేత్తడి హారిక...
బిగ్ బాస్ రియాల్టీ షో ద్వారా మంచి పాపులర్ అయిన దేత్తడి హారిక ఓ కీలక నిర్ణయం తీసుకున్నారు తెలంగాణ రాష్ట్ర పర్యాటక శాఖ బ్రాండ్ అంబాసిడర్ పదవి నుంచి తప్పుకుంటున్నట్టు తాజాగా ప్రకటించారు. ఈ విషయాన్ని సోషల్‌ మీడియా ద్వారా ఆమె వెల్లడించారు.
ఈ నెల 8వ తేదీన ప్రపంచ మహిళా దినోత్సవం రోజున తెలంగాణ రాష్ట్ర పర్యాటక అభివృద్ధి సంస్థ బ్రాండ్ అంబాసిడర్గా హారిక నియమితులయ్యారు. ఈ విషయం బయటకి పొక్కిన తర్వాత వివాదమైంది. పైగా, ఈ నియామకం రోజుకో మలుపు తిరుగుతోంది.
టూరిజం కార్పొరేషన్ డెవలప్‌మెంట్ చైర్మన్ ఆమెను బ్రాండ్ అంబాసిడర్గా ప్రకటిస్తూ అపాయింట్‌మెంట్ ఆర్డర్ మహిళా దినోత్సవం రోజే ఇచ్చేశారు. అయితే ఈ ఉత్తర్వులు రాష్ట్ర ప్రభుత్వంతో సంప్రదించకుండానే ఆయన ఇచ్చినట్లు తెలుస్తోంది. దీంతో సదరు శాఖ మంత్రి టూరిజం శాఖ మంత్రి శ్రీనివాస్‌ గౌడ్ కార్పొరేషన్ చైర్మన్‌పై సీరియస్ అయినట్లు సమాచారం.
అనంతరం మంత్రి శ్రీనివాస్‌ గౌడ్ మీడియాతో మాట్లాడుతూ ఈ విషయమై సంచలన వ్యాఖ్యలు చేశారు. హారిక నియామకం పట్ల సీఎంవోకు గానీ, ఉన్నతాధికారులకు గానీ ఎలాంటి సమాచారమూ లేదని, అసలు ఆమె ఎవరో కూడా తనకు తెలియదని షాకింగ్ కామెంట్స్ చేశారు. దీనిపై విచారించి వేరొకరిని నియమిస్తామని వెల్లడించారు. ఈ నేపథ్యంలోనే హారిక బ్రాండ్ అంబాసిడర్ పదవి నుంచి తప్పుకుంటున్నట్లు తన ట్విట్టర్ ఖాతాలో వెల్లడించారు.
