నువ్వు చెడింది కాకుండా.. చెల్లెల్లి చెడగొడతావా? తల్లిని చంపేసిన కుమారుడు..!
కన్నకూతురిని పెడదారిన పెట్టేందుకు ప్రయత్నించిన తల్లిని సొంత కొడుకే హతమార్చిన ఘటన హైదరాబాదులో చోటుచేసుకుంది. వివరాల్లోకి వెళితే.. హైదరాబాద్‌లోని ఎల్లమ్మ బండకు చెందిన సురేష్ ఆటో డ్రైవర్‌గా పని చేస్తూ జీవనం సాగిస్తున్నాడు.
తల్లిదండ్రులు, చెల్లెలు, భార్యతో కలిసి ఓ ఇంట్లో అద్దెకు ఉంటున్నాడు. అయితే డబ్బుల సంపాధన కోసం సురేష్ తల్లి మల్లమ్మ (40) తప్పుడు మార్గాలను ఎంచుకుంది. ఈ క్రమంలో ఆమె భర్త మద్యానికి బానిసగా మారాడు. ఇందు కోసం అతను భిక్షటన చేస్తున్నాడు.
ఈ క్రమంలో డబ్బులు బాగా సంపాదించాలనే ఆశతో మల్లమ్మ తన మైనర్‌ కుమార్తెను కూడా తను ఉన్న ఆ చెడు మార్గంలోకి తీసుకెళ్లాలని ప్లాన్ వేయడం ప్రారంభించింది. ఈ విషయం సురేష్‌కు తెలియడంతో అతను తల్లిపై అనేక సార్లు ఆగ్రహం వ్యక్తం చేశాడు. అయినా ఆమె తన పద్ధతి మార్చుకోలేదు.
ఈ వ్యవహారం కాస్త పెద్ద గొడవకు దారితీసింది. దీంతో సురేష్ తీవ్ర ఆగ్రహానికి గురై చీర కొంగును మల్లమ్మ గొంతుకు బిగించి హత్య చేశాడు. ఈ విషయమై కేసు నమోదు చేసిన పోలీసులు దర్యాప్తు చేస్తున్నారు.
