పెళ్లిపై సదుద్దేశం లేదు.. అందుకే పెళ్ళికి అంగీకరించలేదు : నటి కౌసల్య
తనకు పెళ్లిపై సదుద్దేశం లేదని అందుకే తాను పెళ్లికి అంగీకరించలేదని సినీ నటి కౌసల్య అన్నారు. ఒకపుడు హీరోయిన్‌గా రాణించిన కౌసల్య.. ఇపుడు క్యారెక్టర్ ఆర్టిస్ట్‌గా రాణిస్తున్నారు. ఇప్పటివరకు వివాహం చేసుకోలేదు. ఈ నేపథ్యంలో తాజాగా ఇచ్చిన ఇంటర్వ్యూలో ఆమె తాను పెళ్లి చేసుకోకపోవడానికి గల కారణాలను వివరించారు. తనకు పెళ్లిపై సదుద్దేశం లేదని, అందుకే పెళ్లి చేసుకోలేదని చెప్పారు.
'పెళ్లి అనే అంశంపై నాకు ఎలాంటి వ్యతిరేకత లేదు. సరైన వ్యక్తి జీవితంలోకి అడుగు పెట్టినప్పుడు వైవాహిక బంధం తప్పకుండా అందంగా ఉంటుంది. పెళ్లిపై నాకు ఎన్నో ఆలోచనలు ఉండేవి. పెళ్లి అనే విషయానికి నేను సెట్ కానని మొదట్లో అనుకునేదాన్ని. నాకు సరైన వ్యక్తి దొరకడేమో అని భయపడేదాన్ని. ఓ దశలో సరైన బంధం కోసం ఎదురుచూశా. కానీ, అది నాకు సెట్ కాలేదు. తల్లిదండ్రులతోనే ఉండాలని నిర్ణయించుకున్నా.
వాళ్లతో నాకు మంచి అనుబంధం ఉంది. అదేసమయంలో పెళ్లైతే అత్తమామలతో ఎలా ఉంటానోనని కంగారుపడ్డా. ఇలాంటి ఆలోచనలతో రిలేషన్, పెళ్లి అనే విషయాలకు కొంతకాలం పాటు దూరంగా ఉన్నా. కొన్నేళ్ల క్రితం నేను అనారోగ్యానికి గురయ్యా. బరువు బాగా పెరిగాను. అప్పట్లో నేను నటించిన కొన్ని సినిమాలు సరైన సంతృప్తిని అందించలేదు. దాంతో అన్నింటి నుంచి బ్రేక్ తీసుకున్నా. ఇప్పుడు ఆరోగ్యంగానే ఉన్నా' అని ఆమె చెప్పారు.
