రవిశాస్త్రికి ఉద్వాసన? కొత్త కోచ్ వేటలో బీసీసీఐ (Video)
ఇంగ్లండ్ వేదికగా జరిగిన ఐసీసీ క్రికెట్ ప్రపంచ కప్ పోటీల్లో భారత క్రికెట్ జట్టు సెమీ ఫైనల్ నుంచి నిష్క్రమించింది. ఈ మ్యాచ్లో న్యూజిలాండ్ జట్టు చేతిలో 18 పరుగుల తేడాతో ఓడిపోయింది. దీంతో ఈ టోర్నీ నుంచి భారత్ నిష్క్రమించింది. అయితే, భారత క్రికెట్ జట్టు కోచ్గా రవిశాస్త్రి ఉన్నారు. ఈయన కాంట్రాక్టు వరల్డ్ కప్తోనే ముగిసింది. కానీ, వెస్టిండీస్ పర్యటన వరకు పొడగించారు. ఆ తర్వాత కొత్త కోచ్ను బీసీసీఐ ఎంపిక చేయనుంది.
అయితే, వరల్డ్ కప్లో భారత్ కథ సెమీస్లోనే ముగియడంతో కోచ్ రవిశాస్త్రికి మరో అవకాశంగానీ, మరోమారు పదవీకాలం పొడిగింపుగానీ ఉండే అవకాశం లేదన్నది బీసీసీఐ వర్గాల సమాచారం. రవిశాస్త్రితో పాటు బౌలింగ్ కోచ్ భరత్ అరుణ్, బ్యాటింగ్ కోచ్ సంజయ్ బంగర్లతో పాటు, ఫీల్డింగ్ కోచ్ శ్రీధర్ల స్థానంలోనూ కొత్తవారిని ఎంపిక చేయాలన్న భావనలో బీసీసీఐ పెద్దలు ఉన్నారు.
ఇప్పటికే భారత ఫిజియో ప్యాట్రిక్ ఫర్హాత్, ట్రైనర్ శంకర్ బసులు బీసీసీఐ ఇంటికి పంపించిన విషయం తెల్సిందే. వెస్టిండీస్ పర్యటన తర్వాత, సెప్టెంబరు 15 నుంచి స్వదేశంలో దక్షిణాఫ్రికాతో జరిగే పోటీల సమయానికి కొత్త కోచ్, అతని సహాయకుల ఎంపిక పూర్తి చేయాలని బీసీసీఐ భావిస్తోంది. మరి కొత్త కోచ్గా ఎవరు వస్తారన్నది ఇపుడు చర్చనీయాంశంగా మారింది.
