ఆ శక్తి పెరగాలంటే.. పుచ్చకాయ తినాల్సిందే..?
పుచ్చకాయ ఆరోగ్యానికి ఎంతో మేలు చేస్తుంది. శరీరానికి కావలసిన విటమిన్స్, ప్రోటీన్స్ అందించడంలో పుచ్చకాయ ఎంతగానో దోహదపడుతుంది. దీనిని తరచు తీసుకుంటే జీర్ణవ్యవస్థ పనితీరు మెరుగుపడుతుంది. పుచ్చకాయ అంటే నచ్చని వారుండరు. పనిపిల్లల నుండి వృద్ధుల వరకు అందరూ ఇష్టంగా తింటారు. అధిక బరువును తగ్గించాలంటే.. రోజుకో గ్లాస్ పుచ్చకాయ జ్యూస్ తాగితే సరిపోతుంది.
పుచ్చకాయను తినడం వలన రక్తనాళాలు గట్టి పడి, బిగుసుకుపోకుండా కూడా కాపాడుతుంది. మెదడును శక్తివంతంగా మార్చడం, మతిమరుపును కలిగించే అల్జీమర్ వ్యాధిని నిరోధించడంలో పుచ్చకాయ మంచి ఔషధంగా పనిచేస్తుంది. పుచ్చకాయలోని నిట్రులిన్ పురుషుల్లో లైంగిక శక్తిని పెంచుతుంది. అలానే వృద్ధాప్యంలో వచ్చే కంటి సమస్యలను కూడా నివారిస్తుంది.
అధిక రక్తపోటును తగ్గిస్తుంది. ఇందులోని మెగ్నిషియం, పొటాషియం వంటి ఖనిజాలు గుండె సంబంధిత వ్యాధులు రాకుండా కాపాడుతాయి. పుచ్చకాయలో లభించే యాంటీ ఆక్సిడెంట్స్ శరీరంలో తిరుగాడే హానికారక ఫ్రీర్యాడికల్స్‌ను అణచివేయడం ద్వారా ఆరోగ్యానికి మేలుచేస్తాయి. పుచ్చకాయ ఈ వేసవి కాలంలో శరీరానికి కావలసిన నీటిని అందిస్తుంది. ఇందులోని విటమిన్ ఎ కేశ సంరక్షణలో బాగా తోడ్పడుతుంది.
అజీర్తితో బాధపడేవారు తరచు పుచ్చకాయ తింటుంటే సమస్య నుండి ఉపశమనం లభిస్తుంది. పుచ్చకాయలో 92 శాతం నీరు ఉండడం వలన వేసవిలో ఇది శరీరానికి కావలసిన చల్లదనాన్ని అందిస్తుంది. ముఖ్యంగా దాహాన్ని తగ్గిస్తుంది. ఇందులోని బీటా కెరిటోన్స్ శ్వాసకోశాలను ఆరోగ్యంగా ఉండేలా చేస్తాయి. దాంతోపాటు శరీర రోగనిరోధకశక్తిని కూడా పెంచుతాయి.
