తెలంగాణ రాజకీయాల్లో నిజమైన జంపింగ్ స్టార్ ఎవరో తెలుసా?
సీనియర్ ఎన్టీఆర్‌తో ఉన్న అనుబంధం కారణంగా బాబు మోహన్ టిడిపిలో తన రాజకీయ కెరీర్‌ ప్రారంభించి, 1998లో ఆందోల్ నుండి ఎమ్మెల్యేగా గెలిచి, ఉమ్మడి ఆంధ్రప్రదేశ్‌లో మంత్రిగా పనిచేశారు.
టీడీపీలో చాలా ఏళ్ల తర్వాత, తెలంగాణలో 2014లో బీఆర్‌ఎస్‌కు వెళ్లి మళ్లీ ఆందోల్ అసెంబ్లీ స్థానాన్ని గెలుచుకున్నారు.తర్వాత 2018లో బీజేపీలోకి వెళ్లి ఐదేళ్లపాటు అక్కడే ఉండి 2023లో కిషన్‌రెడ్డి, బండి సంజయ్‌ల వల్ల అవమానం జరిగిందంటూ నిష్క్రమించారు. ఆ తర్వాత కేఏ పాల్ ప్రజాశాంతి పార్టీలో చేరారు. ఈ పార్టీకి బాబు మోహన్ తెలంగాణ విభాగం అధ్యక్షుడిగా ఎంపికయ్యాడు.
ఇప్పుడు కట్ చేస్తే, అకస్మాత్తుగా, బాబు మోహన్ మళ్లీ బీఆర్ఎస్‌లో చేరడం ఖాయంగా కనిపిస్తోంది. కడియం కావ్య బీఆర్ఎస్ నుంచి ఫిరాయించి, కాంగ్రెస్‌లో చేరడానికి సిద్ధంగా ఉన్నందున, బాబు మోహన్‌కు కేసీఆర్ వరంగల్ ఎంపీ టిక్కెట్‌ను ఆఫర్ చేసినట్లు సమాచారం. ఆయన త్వరలో పీఎస్పీని వీడి తిరిగి బీఆర్ఎస్‌లో చేరి వరంగల్ ఎంపీ అభ్యర్థిగా పోటీ చేయవచ్చునని టాక్ వస్తోంది.
రాజకీయంగా నిలకడలేని బాబు మోహన్ టీడీపీ నుంచి టీఆర్‌ఎస్‌లోకి బీజేపీలోకి ప్రజాశాంతికి మళ్లీ బీఆర్‌ఎస్‌లోకి వెళ్లిపోనున్నారు. కాంగ్రెస్ మినహా, బాబు మోహన్ తెలంగాణలోని దాదాపు అన్నీ రాజకీయ పార్టీలను కవర్ చేశారనే చెప్పాలి. దీంతో బాబుమోహన్‌ను నెటిజన్లు తెగ ఆడుకుంటున్నారు. తెలంగాణ రాజకీయాల్లో నిజమైన జంపింగ్ స్టార్ బాబు మోహనేనని ఫన్నీగా కామెంట్లు పెడుతున్నారు.
