బంజారాహిల్స్ రేప్ కేసు - ఇన్నోవా కారు డ్రైవర్‌ - తల్లిదండ్రులపై కేసు
దేశంలో సంచలనం సృష్టించిన బంజారాహిల్స్ బాలిక అత్యాచారం కేసులో నిందితులు ఉపయోగించిన ఇన్నోవా కారు డ్రైవర్‌తో పాటు నిందితుల తల్లిదండ్రులపై హైదరాబాద్ నగర పోలీసులు కేసులు నమోదు చేశారు. పోక్సో చట్ట ప్రకారం మైనర్ బాలికపై అత్యాచారం జరిగినపుడు ఆ విషయం తెలిసి కూడా పోలీసులకు సమాచారం ఇవ్వక పోవడాన్ని నేరంగా పరిగణిస్తారు.
ఈ నేపథ్యంలో సాదుద్దీన్ సహా మిగతా నిందితుల తల్లిదండ్రులకు పోలీసులు నోటీసులు జారీ చేశారు. బెంజ్, ఇన్నోవా కార్లను మైనర్లు నడిపినట్టు సాక్ష్యాలు సేకరించిన పోలీసులు ట్రాఫిక్, శాంతిభద్రతల పోలీసులు కేసులు నమోదు చేశారు.
అలాగే, బాలికపై అత్యాచారానికి పాల్పడిన నిందితులు ఆ తర్వాత ఆధారాలను చెరిపివేసే ప్రయత్నం చేసినట్టు గుర్తించిన పోలీసులు అందుకు సంబంధించిన సాక్ష్యాలను సేకరించారు. బాధితురాలిని తీసుకెళ్లిన ఇన్నోవా కారు పోలీసుల దృష్టిలో పడకుండా ప్రభుత్వ సంస్థ ఛైర్మన్ కారును డ్రైవర్‌కు అప్పగించారు.
అతడు దానిని మెయినాబాద్‌ సమీపంలోని అజీజ్‌నగర్‌లో ఓ వ్యవసాయ క్షేత్రంలో నిలిపి వచ్చేశాడు. ఆ క్షేత్రం ప్రభుత్వ సంస్థ ఛైర్మన్‌దేనని విచారణలో నిందితులు పోలీసులకు తెలిపారు. కాగా, మైనర్ల విచారణ మంగళవారంతో ముగిసింది. కోర్టు అనుమతిస్తే కనుక ఒకటి రెండు రోజుల్లో టెస్ట్ ఐడెంటిఫికేషన్‌ పరేడ్‌ నిర్వహిస్తామని పోలీసులు తెలిపారు.
