జానీ మాస్టర్‌కు తప్పని చిక్కులు.. బెయిల్ పిటిషన్ విచారణ వాయిదా
కొరియోగ్రాఫర్ షేక్ జానీ అకా జానీ మాస్టర్ లైంగిక వేధింపులకు సంబంధించిన కేసులో అరెస్టయ్యాడు. జానీ కేసుపై ప్రస్తుతం విచారణ కొనసాగుతోంది. జానీ మాస్టర్.. అసిస్టెంట్ కొరియోగ్రాఫర్ మైనర్‌గా ఉన్నప్పుడు లైంగికంగా వేధించాడని ఫిర్యాదు అందడంతో అతనిపై పోక్సో కేసు నమోదైంది.
ఈ కేసులో జానీకి ఎలాంటి ఉపశమనం లభించలేదు. జానీ బెయిల్ పిటిషన్‌పై విచారణను రంగారెడ్డి జిల్లా ప్రత్యేక ఫాస్ట్ ట్రాక్ పోక్సో కోర్టు అక్టోబర్ 7వ తేదీకి వాయిదా వేసింది. పోలీసులు జానీని విచారించగా, కేసుకు సంబంధించి కొన్ని కీలక విషయాలు బయటపడ్డాయి.
జానీ మాస్టర్ తన అసిస్టెంట్ కొరియోగ్రాఫర్‌గా ఉన్న యువతిపై అత్యాచారం చేశాడని ఆరోపణలు వున్నాయి. తనకు లొంగని పక్షంలో జానీ మాస్టర్ తనను ఉద్యోగం నుంచి తొలగిస్తానని బెదిరించాడని, సినీ పరిశ్రమలో తన కెరీర్‌ను మరింత క్లిష్టతరం చేస్తానని బెదిరించాడని ఆమె ఫిర్యాదులో పేర్కొంది.
షూటింగుల సమయంలో వానిటీ వ్యాన్‌లో, తన నివాసంలో కూడా జానీ తనపై పలుమార్లు లైంగిక దాడి చేశాడని ఆమె పేర్కొంది. తనను పెళ్లి చేసుకునేందుకు మతం మారాలని జానీ తనను బెదిరించాడని, తన ఇంటికొచ్చి తనపై దాడి చేసిన కేసులో జానీ భార్య కూడా ప్రమేయం ఉందని బాధితురాలు పేర్కొంది. జానీకి ప్రాథమిక రిమాండ్ అక్టోబర్ 3 వరకు ఉంది. అయితే కోర్టు బెయిల్ విచారణను వాయిదా వేయడంతో, అతను అక్టోబర్ 7 వరకు జైలులో ఉండాల్సిన పరిస్థితి ఏర్పడింది.
