పనిమనిషితో ఎలుక డ్యాన్స్... 'ఎలుకా మజాకా' రివ్యూ
ఏడాదిగా సాగుతూ వచ్చిన ఎలుకా మజాకా చిత్రం విడుదల... రివ్యూ
ఎలుకా మజాకా చిత్రం దర్శకత్వం : రేలంగి నరసింహారావు, నిర్మాత : మారెళ్ల నరసింహారావు, వడ్డెంపూడి శ్రీనివాసరావు, సంగీతం : బల్లేపల్లి మోహన్, నటీనటులు : వెన్నెల కిషోర్, బ్రహ్మానందం, పావని..
కామెడీలో తనకంటూ ప్రత్యేకతను సంపాదించుకున్న ఒకప్పటి దర్శకుడు రేలంగి నరసింహారావు. ఇప్పటి ట్రెండ్‌కు తగినట్లుగా సినిమా తీయలేక చాలాకాలం గ్యాప్‌ ఇచ్చారు. తాజాగా 'ఎలుకా మజాకా' అనే పేరుతో సినిమా తీశారు. ఆయన కెరీర్‌లో 75వ సినిమా. బ్రహ్మానందాన్ని ఎలుకగా చూపిస్తూ ఆయన చేసే విన్యాసాలు ఎలా వున్నాయో చూద్దాం.
కథ :
వెన్నెల కిషోర్ హైద్రాబాద్‌లో జరిగే పలు వేడుకలకు పూలు సరఫరా చేసే వ్యాపారం నిర్వహిస్తూ ఉంటాడు. అలాంటి వెన్నెల కిషోర్, చెప్పిన టైమ్‌కి రాకపోయినా, చెప్పిన పని చేయకపోయినా విచిత్రమైన కండిషన్లతో ఇబ్బంది పెట్టే రఘుబాబు కూతురిని ప్రేమిస్తాడు. ఈ క్రమంలోనే రఘుబాబు కండిషన్‌కు కట్టుబడి ఉండేందుకు వెన్నెల కిషోర్, వినాయకుడిని కూడా లెక్క చేయకూడని పరిస్థితి వస్తుంది. దీంతో వినాయకుడి వాహనమైన ఎలుక అతడిని ఎలాగైనా శిక్షించాలని ఓ ఎలుక (బ్రహ్మానందం)ను అతడుండే ప్రదేశానికి పంపిస్తుంది. కండిషన్స్ పెట్టే మామతోనే తట్టుకోవడం కష్టమనే పరిస్థితుల్లో వెన్నెల కిషోర్, ఈ ఎలుక పెట్టే ఇబ్బందులను కూడా ఎలా ఎదుర్కొన్నాడు? ఈ పరిస్థితులన్నీ అతడి కాపురంలో ఎలాంటి మార్పులు తెచ్చాయి? చివరకు వీటన్నింటినీ వెన్నెల కిషోర్ ఎలా ఎదుర్కొని బయటపడ్డాడు? అన్నది మిగతా కథ.
పెర్‌ఫార్మెన్స్‌
బ్రహ్మానందం, వెన్నెల కిశోర్‌లు కథకు సరిపడే విధంగా బాగా నటించారు. ఎక్కువ సీన్లు వీరిచుట్టూనే తిరుగుతాయి. ఇక రఘుబాబు మేనరిజం బాగుంది.
సాంకేతిక సిబ్బంది:
సినిమాటోగ్రఫీ ఫరవాలేదనిపిస్తుంది. సంగీత దర్శకుడి గురించి పెద్దగా చెప్పుకోవడానికి ఏమీ లేదు. టైటిల్ సాంగ్ ఫరవాలేదనిపించినా మిగతా పాటలేవీ బాగాలేవు. ఎడిటింగ్ కూడా బాగా లేదు. గ్రాఫిక్స్ 40 నిముషాలు పాటు ఉన్నా ఏదీ అబ్బురంగా అనిపించదు. ప్రొడక్షన్ వ్యాల్యూస్ కూడా అంతంతమాత్రమే! ముందుగా దర్శకుడు రేలంగి నరసింహారావు గురించి చెప్పుకుంటే, ఇలాంటి కథను సినిమాగా చెప్పాలన్న దర్శకుడి ఆలోచనను అభినందించాల్సిందే. కానీ ఆ ఆలోచనను ఒక పూర్తిస్థాయి సినిమాగా మలచడంలో మాత్రం మెప్పించలేకపోయాడు. సన్నివేశాల్లో ఏమాత్రం కొత్తదనం లేదు. దర్శకుడి ప్రతిభ చూపించే సన్నివేశాలు ఎక్కడా కానరావు.
విశ్లేషణ
ఈ సినిమా కథ కొత్తగా అనిపించినా దానిచుట్టూ రాసుకున్న సీన్స్ ఏమాత్రం ఆకట్టుకోవు. ఈ సినిమాకు మేజర్ మైనస్ పాయింట్ అంటే ఆకట్టుకోని సీన్స్ అని చెప్పుకోవచ్చు. ఒక సీన్ తరువాత ఇంకో సీన్ వస్తూనే ఉంటాయి కానీ అవి అంతగా ఆకట్టుకోవు. ఎలుక ఇబ్బంది పెట్టే ఏ పనులు కూడా హాస్యాన్ని కలిగించలేదు. ఎలుకగా నటించిన బ్రహ్మానందం నటన మొదట్లో బాగుందనిపించినా తరువాత విసుగెత్తిస్తుంది. ఉన్నట్లుండి పనిమనిషితో ఒక ఐటం సాంగ్ పెట్టడం చూస్తే ఏమనుకోవాలో అర్థం కాదు.
కథను ఇంట్లో, షాపులో, గార్డెన్‌లో ఇలా అతి తక్కువ లొకేషన్స్‌లో చిత్రీకరించడం వల్ల సినిమాలో మొనాటనీ ఎక్కువైందనిపిస్తుంది. ప్రతి సీన్లో కామెడీ కోసం ప్రయత్నించినా ఎక్కడా అది పండకపోవడం ఈ సినిమాకు ప్రధాన మైనస్ పాయింట్. నలభై నిముషాల పాటు గ్రాఫిక్స్ ఉన్నాయి అని చెప్పుకున్నా అవి ఎంతమాత్రం ఆకట్టుకునేలా లేవు. 2 గంటల 11 నిముషాల రన్ టైం కూడా ఈ సినిమాకు మరో మైనస్ పాయింట్. ఎలుక నేపథ్యంతో కామెడీ అన్న ప్రచారంతో ముందుకొచ్చిన సినిమా ‘ఎలుకా మజాకా’, అసలు చెప్పిన ప్రధానాంశమే లేని ఓ అర్థం పర్థం లేని కామెడీగా నిలిచిందని చెప్పుకోవచ్చు. ఎక్కడా పూర్తి స్థాయిలో ప్రేక్షకులను అలరించే సన్నివేశాలు లేకపోవడం, కామెడీతో మనల్ని ఎంతగానో నవ్వించిన యాక్టర్స్ ఉన్నా కూడా ఆ పాత్రల్లోనూ బలం లేకపోవడం, సినిమాటిక్ ఎక్స్‌పీరియన్స్ అన్నదానికి చాలా దూరంలో నిలవడం లాంటి ఎన్నో మైనస్‌లతో ముందుకు వచ్చిన ఈ సినిమాలో బేసిక్ కథ బాగుందన్న విషయం తప్ప చెప్పుకోవడానికి ఏమీ లేదు. ఒక్క మాటలో చెప్పాలంటే.. ఏం చెప్పాలని వచ్చిందో, అదే చెప్పకుండా, ఎటూ కాకుండా నిలిచిన సినిమాయే ‘ఎలుకా మజాకా’
