గరిట కాల్చి భర్త చెంపపై వాత పెట్టిన భార్య... ఎక్కడ?
హైదరాబాద్ నగరంలోని బంజారాహిల్స్‌లో ఓ భార్య.. కట్టుకున్న భర్తకు వాతపెట్టింది. గరిట కాల్చి భర్త చెంపపై వాత పెట్టింది. తన అన్న దమ్ములతో కలిసి ఈ పనికిపాల్పడింది. తాజాగా వెలుగులోకి వచ్చిన ఈ వివరాలను పరిశీలిస్తే, బంజారాహిల్స్ రోడ్ నంబర్ 13లోని అంబేద్కర్ నగర్‌కు చెందిన గుండప్ప తన భార్య లక్ష్మి, పిల్లలతో కలిసి నాలుగేళ్లుగా ఇక్కడ ఉంటున్నారు. అయితే, వారి ఇంటికి సమీపంలోనే ఇద్దరు బామ్మర్ధులు కూడా ఉంటున్నారు.
ఈ క్రమంలో గుండప్పకు, బామ్మర్ధులకు మధ్య గత కొంతకాలంగా గొడవలు జరుగుతున్నాయి. దీంతో ఇల్లు వదిలి వెల్లిపోవాలంటూ గుండప్పపై బామ్మర్ధులు ఒత్తిడి తెస్తూవచ్చారు. ఈ క్రమంలో ఈ నెల 7వ తేదీ రాత్రి 7 గంటల ప్రాంతంలో బామ్మర్ధులు గోవింద్, బాలాజీ అతడిని చేతులతో, కర్రతో కొట్టగా, భార్య లక్ష్మి గరిట కాల్చి చెంపమీద వాతపెట్టారు. దీంతో తీవ్ర గాయాలపాలైన గుండప్ప.. గురువారం బంజారాహిల్స్ పోలీస్ స్టేషన్‌లో ఫిర్యాదు చేశారు.
