మాంసాహారం అందుకు పనికిరాదట..?
ఆహారంలో శాకాహారం ఉత్తమం అంటున్నారు వైద్యులు. శాకాహారం తీసుకుంటే అధిక రక్తపోటునుండి కూడా మనిషి తననిన తాను కాపాడుకోవచ్చునని వైద్యులు సూచిస్తున్నారు. పౌష్టికాహారమే శరీరాన్ని మనస్సును ఆరోగ్యంగా వుంచుతుంది. భోజనంలో శరీరానికి కావలసిన ఖనిజ పదార్థాలు, ప్రొటీన్లు, కార్బోహైడ్రేట్లు, విటమిన్లతోపాటు పోషకపదార్థాలుండాలి.
సమపాళ్ళలో తీసుకునే శాకాహారం శరీరానికి అన్నిరకాల పోషకాలను అందిస్తుంది. దీంతో గుండెజబ్బులు, క్యాన్సర్, అధిక రక్తపోటు, మధుమేహం, కీళ్లనొప్పులు ఇతర జబ్బులనుండి కూడా బయటపడగలుగుతామని వైద్యులు చెప్తున్నారు.
మాంసాహారం అధికంగా తీసుకునేవారిలో అధిక రక్తపోటును నివారించే అమినో ఆమ్లాలుండవు. అదే శాకాహారంలో అమినో ఆమ్లాలు అధికంగా వుంటాయి. ఈ అమినో ఆమ్లాలు రక్తపోటును నివారిస్తాయి. కాయగూరల్లో అమినో ఆమ్లంతోబాటు మెగ్నీషియం కూడా వుంటుందని ఇది రక్తపోటును క్రమబద్దీకరిస్తుందని పరిశోధకులు తెలిపారు. ఇంతేకాకుండా మాంసాహారుల్లో ఫైబర్ శాతం కూడా తక్కువగా వుంటుందని ఇప్పటికే నిర్వహించిన పరిశోధనల్లో తేలింది.
ఫైబర్ మనకు ధాన్యాలలో అధికంగా లభిస్తుంది. పప్పులు, పండ్ల రసాలు, ఫ్రూట్ సలాడ్‌లలో అధికంగా లభిస్తుంది. ఇవి శరీర బరువును కూడా క్రమబద్ధీకరిస్తాయి. మాంసాహారం ఎక్కువగా తీసుకుంటే ఊబకాయం పెరిగిపోతుం. కొవ్వుకూడా అధికంగా పేరుకు పోతుంది. ముఖ్యంగా శరీరానికి కార్బోహైడ్రేట్లు కూడా ఎంతో అవసరం. మాంసాహారంలో కార్బోహైడ్రేట్లు వుండవు. ఇది బ్రెడ్, రొట్టెలు, అరటిపండు, బంగాళాదుంపల్లో ఎక్కువగా దొరుకుతుంది.
శరీరంలో రక్తం వృద్ధికి మాంసాహారం పనికిరాదు. శరీరంలో రక్త శాతం పెరగాలంటే ఆకుకూరలు, పుదీనా, బెల్లం తదితరాలు తీసుకోవాల్సివుంటుంది. మాంసాహారం నుంచి లభించని బలం పుష్టికరమైన శాఖాహారం నుండి లభిస్తుంది. మాంసాహారం అధికంగా తీసుకుంటే ఆవేశం, ఒత్తిడి తప్పవు. అందుకే శాకాహారానికి ఎక్కువ ప్రాధాన్యత ఇవ్వాలని.. ఇలా చేస్తే ఆరోగ్యానికి ఎంతో మేలు చేకూర్చిన వారవుతారని ఆరోగ్య నిపుణులు సూచిస్తున్నారు.
