అక్క కుమార్తె మొబైల్కు అశ్లీల వీడియోలు.. అసభ్యకర సందేశాలు...
కంటికి రెప్పలా కాపాడాల్సిన మేనమామ... తన మేనకోడలి (సొంత అక్క కుమార్తె)పై కన్నేశాడు. ఆ యువతి మొబైల్ ఫోనుకు అశ్లీల, అసభ్యకర సందేశాలు పంపుతూ వేధించాడు. దీనిపై యువతి తల్లి పోలీసుకు ఫిర్యాదు చేయడంతో ఈ విషయం వెలుగులోకి వచ్చింది. చెన్నై తేనాంపేట పోలీస్ స్టేషన్ పరిధిలో జరిగిన ఈ వివరాలను పరిశీలిస్తే,
పోలీసులకు ఇచ్చిన ఫిర్యాదులో ఆ మహిళ... తన సోదరుడు చెల్లవేల్ వైద్య విద్య చదివేందుకు తాను రూ.5 లక్షలు ఖర్చు చేశానని, వైద్యుడైన తర్వాత తన కుమార్తెను పెళ్లి చేసుకుంటానని చెప్పాడని, అందువలనే రూ.5 లక్షలు అప్పుగా ఇచ్చానని, అయితే ఇప్పుడు పెళ్లి చేసుకోనని, నగదు తిరిగివ్వనని చెల్లవేల్ మోసం చేశాడని పేర్కొన్నారు.
అంతేకాకుండా తన కుమార్తె సెల్ఫోన్కి అశ్లీల ఫొటోలు, అసభ్యకర మెసేజ్లు పంపుతున్నాడని, తనను, కుమార్తెను చంపేస్తానని బెదిరిస్తున్నాడని, తన కుమార్తె ఫొటోలను అశ్లీలంగా చిత్రీకరించి సోషల్ మీడియాలో షేర్ చేస్తానని బెదిరించాడని, అతనిపై చర్యలు తీసుకోవాలని కోరారు.
ఆ మేరకు పోలీసులు చెల్లవేల్పై కేసు నమోదు చేసుకుని దర్యాప్తు చేశారు. చెల్లవేల్(40) ఇటీవల ప్రభుత్వ వైద్యుడిగా నియామకపత్రం అందుకుని తంజావూర్ జిల్లా మరుంకుళం ప్రభుత్వ ప్రాథమిక ఆరోగ్య కేంద్రంలో పనిచేస్తున్నట్లు తెలిసింది. అక్కడికి వెళ్లిన పోలీసులు ఆయనను అరెస్టు చేసి చెన్నైకి తీసుకొచ్చారు. అతనిపై తంజావూరులో కూడా ఓ క్రిమినల్ కేసు ఉన్నట్లు తెలిసింది. దర్యాప్తు కొనసాగుతోంది.

