మాయా'లేడి' : పెళ్లి పేరుతో టెక్కీ వద్ద రూ.16 లక్షలు దోచుకుంది.. ఎక్కడ?
ఓ మాయలేడి ఏకంగా సాఫ్ట్‌వేర్ ఇంజనీర్‌ను మోసం చేసింది. పెళ్లి పేరుతో ఏకంగా రూ.16.82 లక్షలను దోచుకుకుంది. ఈ ఘటన దేశ ఐటీ రాజధానిగా ఉన్న బెంగుళూరు నగరంలో జరిగింది. తాజాగా వెలుగులోకి వచ్చిన ఈ వివరాలను పరిశీలిస్తే,
బెంగళూరుకు చెందిన అంకుర్ శర్మ అనే వ్యక్తి టెక్కీగా పని చేస్తున్నాడు. ఓ మేట్రిమోనియల్ సైట్ ద్వారా అతడికి కిరారా శర్మ అనే యువతితో పరిచయం ఏర్పడింది. ఇద్దరూ పెళ్లి చేసుకోవాలని నిర్ణయించుకున్నారు. ఈ క్రమంలో తరచూ ఫోన్లో మాట్లాడుకునేవారు.
ఈ నేపథ్యంలో అతడికి మరింత దగ్గరైన యువతి వివిధ కారణాలు చెబుతూ అంకుర్ శర్మ నుంచి ఏకంగా రూ.16.82 లక్షలు తీసుకుంది. ఆ తర్వాత క్రమంగా అతడిని దూరం పెట్టసాగింది.
పైగా, ఆమె వివాహానికి ఒప్పుకోకపోవడమేకాకుండా తీసుకున్న డబ్బులు కూడా తిరిగి ఇవ్వలేదు. దీంతో తాను మోసపోయానని తెలుసుకున్న బాధితుడు పోలీసులను ఆశ్రయించాడు. కేసు నమోదు చేసుకున్న పోలీసులు దర్యాప్తు చేస్తున్నారు.
