విజయ్ దేవరకొండ ప్రాజెక్ట్ చేతులు మారింది..!

Publish: Mon, 4 May 2020 (14:09 IST) Updated: Mon, 4 May 2020 (14:11 IST)

సెన్సేషనల్ హీరో విజయ్ దేవరకొండ నటిస్తున్న తాజా చిత్రం ఫైటర్. డాషింగ్ డైరెక్టర్ పూరి జగన్నాథ్ దర్శకత్వంలో రూపొందుతోన్న ఈ సినిమా ముంబాయిలో నలభై రోజులు షూటింగ్ జరుపుకుంది. ఏప్రిల్ నెలలో తాజా షెడ్యూల్ ప్రారంభించాలి అనుకుంటే.. లాక్ డౌన్ వలన షూటింగ్స్ ఆగిన విషయం తెలిసిందే. పాన్ ఇండియా మూవీగా రూపొందుతోన్న ఈ సినిమాని పూరి - ఛార్మి - కరణ్ జోహర్ సంయుక్తంగా నిర్మిస్తున్నారు. 

విజయ్ దేవరకొండ - బాలీవుడ్ బ్యూటీ అనన్య పాండే జంటగా నటిస్తున్న ఈ సినిమా ముంబాయి బ్యాక్ డ్రాప్‌లో రూపొందుతోంది. ఇదిలా ఉంటే.. ఈ సినిమా తర్వాత విజయ్ నిన్నుకోరి, మజిలీ చిత్రాల దర్శకుడు శివ నిర్వాణ దర్శకత్వంలో ఓ సినిమా చేయనున్నట్టు ఎనౌన్స్ చేసారు. ఈ సినిమాని శ్రీ వెంకటేశ్వర క్రియేషన్స్ బ్యానర్ పైన దిల్ రాజు నిర్మించనున్నట్టు ఎనౌన్స్ చేసారు. 

అయితే.. ఇప్పుడు ఈ ప్రాజెక్ట్ చేతులు మారిందని తెలిసింది. అవును.. విజయ్ - శివ నిర్వాణ కాంబినేషన్లో రూపొందే మూవీని మైత్రీ మూవీ మేకర్స్ సంస్థ నిర్మించనున్నట్టు తెలిసింది. కారణం ఏంటంటే.. విజయ్‌తో మైత్రీ సంస్థ హీరో అనే సినిమాని ప్రారంభించింది. ఈ సినిమా కొంత షూటింగ్ జరిగిన తర్వాత ఆగిపోయింది. ఆ తర్వాత ఈ ప్రాజెక్ట్ క్యాన్సిల్ అయ్యింది.

 అందుచేత మైత్రీ వాళ్లకు సినిమా చేస్తానని మాట ఇచ్చారు విజయ్. అందుకనే పూరితో సినిమా అయిన తర్వాత దిల్ రాజు బ్యానర్ లో చేస్తానన్న సినిమాని మైత్రీ మూవీ మేకర్స్ బ్యానర్లో చేస్తున్నాడని తెలిసింది. అదీ..మేటరు.