నా భర్తకు శీఘ్రస్ఖలనం.. సెక్స్థెరపీ వద్దంటూ నన్ను అనుమానిస్తున్నారు.. ఏం చేయాలి?
నా వయస్సు 28 యేళ్లు. చాలా అందంగా ఉంటాను. వివాహమై నాలుగేళ్లు అవుతోంది. నా భర్తకు వివాహమైనప్పటి నుంచి శీఘ్రస్ఖలన సమస్య ఉంది. ఆదిలో ఫరవాలేదనిపించినా మెల్లగా ఈ సమస్య ఎక్కువైంది. క్షణాల్లో వీర్యం స్కలనమైపోతోంది. దీంతో ఇద్దరం తీవ్ర అసంతృప్తికి లోనవుతున్నాం. అయితే, నాకు సెక్స్ కంటే ఆయనే ముఖ్యం. ఆయన కొన్ని నెలలుగా నాతో సరిగా ఉండటం లేదు. పైగా నన్ను అనుమానిస్తున్నారు. నాతో మాట్లాడరు. ఉద్యోగం సరిగా చేయరు. డాక్టర్ వద్దకు వెళ్ళి సెక్స్థెరపీ చేయించుకుందామంటే రానంటున్నారు. డాక్టరు వద్దకు వెళ్ళి చికిత్స తీస్కోవడం నాకు ఆనందం కోసం కాదు. తనకి బాధ తగ్గడం కోసం. ఎంత చెప్పినా హాస్పిటల్కి రారు. ఏం చేయాలి.?
ఇలాంటి సమస్య ఏ ఒక్కరికో కాదు.. ప్రపంచంలోని పురుషుల్లో కోటాను కోట్ల మందికి ఉంది. పైగా ఇది తగ్గని సమస్య ఏ మాత్రమూ కాదు. శీఘ్రంగా అంటే త్వరగా అయ్యే స్ఖలనాన్ని ఆపి, అంగస్తంభన కాలాన్ని పెంచే సెక్స్థెరపీలో కొన్ని అద్భుతమైన టెక్నిక్స్ సాధన చేయడం వల్ల సమస్య నుంచి విముక్తులు కావొచ్చు. కొన్ని టెక్నిక్స్ భర్త విడిగానూ, మరికొన్ని భార్య సహకారంతో చెయ్యాలి. ఫర్ఫార్మెన్స్ ఆంగ్జైటీ వల్ల శీఘ్రస్ఖలన సమస్య ఏర్పడుతుంది.
శీఘ్రస్ఖలనం తగ్గకపోతే ఫర్ఫార్మెన్స్ ఆంగ్జైటీ ఇంకా ఎక్కువ అవుతుంది. రెండూ ఒక దానిలో ఒకటి కలిసిపోయి ఉంటాయి. ఫర్ఫార్మెన్స్ ఆంగ్జైటీ తగ్గడానికి, సమస్య పట్ల సరైన జ్ఞానం, విశ్లేషణ, సెక్స్ సైకాలజీ, నార్మల్ సెక్స్ రెస్పాన్స్ సైకిల్ని తెలుసుకోవడం చాలా అవసరం. అలాగే సైకోథెరపీ ఉండనే ఉంది. శీఘ్రస్ఖలన సమస్యకు మానసిక కారణాలు విపరీతమైన ఆందోళన, భయం, టెన్షన్, అంగస్తంభన నిలిచి ఉండే కాలంపై అపోహలు, అజానం నిన్నటిలా త్వరగా అయిపోతుందన్న ముందస్తు భయం, ఎక్కువసేపుండి తీరాలన్న స్వీయ డిమాండ్, భాగస్వామి తిరస్కారం, సహకరించకపోవడం లేదా డిమాండ్ చేయడం వంటి కారణాలు ఉంటాయి.
అదేసమయంలో భార్యను సంతృప్తి పరచలేక పోతున్నాననే బాధలోంచి వచ్చిన కోపం, చిరాకు, ఆత్మన్యూనత మిమ్మల్ని అనుమానించే స్థాయికి తీసుకెళ్ళింది. సెక్స్ కంటే తన ప్రేమే ముఖ్యమని భరోసా ఇవ్వండి. సమస్య లైంగిక ఆరోగ్యం కిందికి వస్తుంది. ఇతర శారీరక అనారోగ్యాల్లాగా దీన్ని అంతే సాధారణ విషయంగా పరిగణించి చికిత్స తీసుకోవాలని చెప్పండి. ఇందులో సిగ్గు పడాల్సిన అవసరమేమీ లేదని చెప్పండి. మీ వారిని సెక్సాలజిస్ట్ వద్దకు తీసుకెళ్ళండి. ఇద్దరికీ కౌన్సెలింగ్, సెక్స్ - సైకోథెరపీ చాలా అవసరం. కొద్ది రోజుల చికిత్సతో తగ్గిపోయే సమస్యను జీవితాంతం నరకంగా మార్చుకోవద్దు.
