1. వార్తలు
  2. తెలుగు వార్తలు
  3. తెలుగు వార్తలు
  4. Tirupati : Road Accident, Four People died

తిరుపతి జిల్లాలో నలుగురి ప్రాణాలు తీసిన విజిల్.. ఎలా?

road accident
అటవీ శాఖ అధికారి ఒకరు విజిల్ వేయడంతో నలుగురు ప్రాణాలు కోల్పోయారు. మరో ఏడుగురు తీవ్రంగా గాయపడ్డారు. ఈ విషాదకర ఘటన తిరుపతి జిల్లాలో జరిగింది. తాజాగా వెలుగులోకి వచ్చిన ఈ వివరాలను పరిశీలిస్తే, 
 
తిరుపతి జిల్లాలో బుధవారం జరిగిన ఈ ప్రమాదంపై పోలీసుల కథనం ప్రకారం.. బెంగళూరు నుంచి శ్రీకాళహస్తి వైపు కలప లోడ్‌తో ఓ లారీ వెళ్తుండగా అదే మార్గంలో చిత్తూరు జిల్లా యాదమరి మండలం పెరుమాళ్లపల్లి నుంచి తిరుపతిలోని బంధువుల వివాహానికి పదకొండు మందితో కూడిన ఆటో బయల్దేరింది. 
 
పాకాల మండలంలోని గాదంకి వద్ద పూతలపట్టు - నాయుడుపేట జాతీయ రహదారిపై అటవీ చెక్‌పోస్టు వద్దకు రాగానే అక్కడి సిబ్బంది విధుల్లో భాగంగా తనిఖీ నిమిత్తం విజిల్‌ ఊదటంతో కలప లారీ డ్రైవర్‌ అకస్మాత్తుగా బ్రేకులు వేశారు. అదే వేగంతో వెనుకనే వస్తున్న ఆటో అదుపుతప్పి లారీని బలంగా ఢీకొనడంతో ప్రమాదం సంభవించింది. 
 
ఈ ఘటనలో ఆటోలో ప్రయాణిస్తున్న చిత్తూరు గ్రామీణ మండలం వేనుగుంటపల్లికి చెందిన యనమల మాధవి (37), ఆమె కుమార్తె మేఘన (15) అక్కడికక్కడే మృతిచెందారు. మాధవి తమ్ముడు, పెరుమాళ్లపల్లికి చెందిన పులికంటి రాజశేఖర్‌ (25)ను ఆసుపత్రికి తరలిస్తుండగా చనిపోయారు. మాధవి తల్లి పులికంటి బేబీ (50) ఆసుపత్రిలో చికిత్స పొందుతూ తుదిశ్వాస విడిచారు. 
 
ప్రమాదంలో గాయపడిన ఆటోడ్రైవర్‌ పులికంటి సుబ్రహ్మణ్యం, పి.చిన్నబ్బ, పి.రఘు, పి.నవీన్, కొమ్ము విష్ణు, యనమల సూరి, చాముండేశ్వరిని రుయా ఆసుపత్రికి తరలించారు. పోలీసులు ఘటనాస్థలానికి చేరుకుని సహాయక చర్యలు చేపట్టారు. కేసు నమోదు చేసి విచారణ జరుపుతున్నారు. 
About Writer
ఠాగూర్
ఠాగూర్ పులపాక ప్రముఖ దినపత్రిక ఈనాడు, చెన్నై కార్యాలయంలో 'న్యూస్ కాంట్రిబ్యూటర్‌'గా జర్నలిజం ఓనమాలు నేర్చుకున్నారు. హైదరాబాద్ కార్యాలయంలో 'ఆంధ్రజ్యోతి' సబ్-ఎడిటర్ పని చేశారు. 2007 నుంచి 'వెబ్ దునియా'లో అసిస్టెంట్ ఎడిటర్‌‌గా విధులు నిర్వహిస్తున్నారు..... మరింత చదవండి
తర్వాతి కథనం
ఎమిరేట్స్‌తో మీ వేసవిని మరింత ఆనందమయం చేసుకోండి!