భార్య, పిల్లల నోటికి ప్లాస్టర్ అంటించి గొంతునులిమి హత్య చేసిన భర్త.. ఆపై తాను కూడా..
కర్నాటక రాష్ట్రంలోని మైసూరులో ఓ దారుణం జరిగింది. మైసూరు జిల్లా హుణసూరు పట్టణం న్యూ మారుతి లేఔట్కు చెందిన ఓ వ్యక్తి అతి కిరాతకంగా ప్రవర్తించాడు. కట్టుకున్న భార్య, ఇద్దరు పిల్లలను హత్య చేసి, ఆ తర్వాత తాను కూడా ఆత్మహత్య చేసుకున్నాడు.
ఈ వివరాలను పరిశీలిస్తే, హరీశ్ (49) అనే వ్యక్తి తన భార్య నిశ్చిత (36), 13, 6 ఏళ్ల వయసున్న ఇద్దరు పిల్లలను హత్య చేసి, అనంతరం తానూ బలవన్మరణానికి పాల్పడ్డాడు. భార్య, పిల్లల నోటికి ప్లాస్టర్ అంటించి, గొంతు నులిమి హత్య చేసి, ఆ తర్వాత ఉరి వేసుకున్నాడని పోలీసులు మంగళవారం ఇక్కడ వెల్లడించారు.
మూడు రోజుల కిందటే తల్లిని తన అమ్మమ్మ వాళ్ల ఊరికి హరీశ్ పంపించాడు. మంగళవారం ఉదయం ఎంతకీ తలుపు తీయకపోవడంతో పొరుగువారికి అనుమానం వచ్చి పోలీసులకు సమాచారం అందించారు. తలుపులు బద్దలు కొట్టి లోపలకు వెళ్లి చూడగా, నలుగురి మృతదేహాలు కనిపించాయి. ఆత్మహత్యకు కారణాలు గుర్తించవలసి ఉందని హుణసూరు ఠాణా పోలీసులు తెలిపారు.

