నెగెటివ్ రివ్యూలు ఇచ్చే వారిపై కఠిన చర్యలు తీసుకోవాలి : సినీ నటి రాధిక
ఒక సినిమా బాగున్నప్పటికీ నెగిటివ్ ప్రచారం చేసే వారిపై యూట్యూబర్స్, కంటెంట్ క్రియేటర్లపై కఠిన చర్యలు తీసుకోవాలని సీనియర్ నటి రాధిక శరత్ కుమార్ కోరారు. ఇందుకోసం ఒక బలమైన వ్యవస్థ ఉండాలని ఆమె సూచించారు. ఇటీవల నగరంలో జరిగిన ఓ కార్యక్రమంలో ఆమె పాల్గొని మాట్లాడుతూ, సినిమా బాగున్నప్పటికీ ఉద్దేశపూర్వకంగా ప్రతికూల ప్రచారం చేస్తున్నారని ఆమె ఆవేదన వ్యక్తం చేశారు.
అదుపుతప్పుతున్న ఇలాంటి కంటెంట్ క్రియేటర్లను నియంత్రించేందుకు ఒక బలమైన వ్యవస్థ ఉండాలని, హద్దులు దాటి ప్రవర్తించే వారిపై కఠిన చర్యలు తీసుకోవాల్సిన అవసరం ఉందని ఆమె స్పష్టం చేశారు. ముఖ్యంగా, డిజిటల్ విస్తృతి పెరిగాక నటీనటులతో పాటు వారి కుటుంబ సభ్యులపైనా కూడా ఇష్టానుసారంగా విమర్శలు చేయడం పరిపాటిగా మారిందన్నారు.
తమను ఎవరూ ప్రశ్నించరనే ధీమాతో కొందరు ఇన్‌ఫ్లుయెన్సర్లు బాధ్యతారాహిత్యంగా వ్యవహరిస్తున్నారని విమర్శించారు. ప్రస్తుతం సినిమా రివ్యూల వ్యవహారం అదుపు తప్పుతోందని, ఇది ప్రపంచ వ్యాప్త సమస్య అయినప్పటికీ మన దగ్గర మరింత తీవ్రంగా ఉందని ఆమె ఆవేదన వ్యక్తం చేశారు.
