పంజా వైష్ణవ్ తేజ్, శ్రీలీల ప్రేమ గీతం హే బుజ్జి బంగారం విడుదల
Panja Vaishnav Tej, Srilila
పంజా వైష్ణవ్ తేజ్, శ్రీలీల కలిసి తొలిసారిగా సితార ఎంటర్‌టైన్‌మెంట్స్ నిర్మిస్తున్న 'ఆదికేశవ' చిత్రంలో నటిస్తున్నారు. ఈ చిత్రం పూర్తి ఫ్యామిలీ, యాక్షన్ ఎంటర్‌టైనర్. వైష్ణవ్ తేజ్ మొదటిసారి యాక్షన్ ఫిల్మ్ లో నటిస్తుండటం విశేషం. జి.వి. ప్రకాష్ కుమార్ సంగీతం అందిస్తున్న ఈ సినిమా నుంచి ఇప్పటికే 'సిత్తరాల సిత్రావతి' అనే పాట విడుదలైంది. విడుదల కాగానే ఈ పాట వైరల్‌గా మారింది. ఈ పాట సంగీతం, సాహిత్యం శ్రోతలను విశేషంగా ఆకట్టుకొని ప్రశంసలు కురిపించాయి.
ఆ పాటలోని శ్రీలీల, పంజా వైష్ణవ్ తేజ్ డ్యాన్స్ మూమెంట్‌లు కూడా వైరల్‌గా మారి ప్రేక్షకుల మెప్పు పొందాయి. ఇప్పుడు, ఆదికేశవ చిత్రం బృందం "హే బుజ్జి బంగారం" అనే మెలోడీని విడుదల చేసింది.
ఈ పాట అబ్బాయి ప్రేమను తెలుపుతూ సాగింది. ముఖ్యంగా అద్భుతమైన సాహిత్యం ఈ సంవత్సరం ప్రతి రొమాంటిక్ ప్లేలిస్టులో ఈ పాటను భాగం చేసేలా ఉంది. జి.వి.ప్రకాష్ సంగీతం ఈ రొమాంటిక్ పాటకి ఓ కొత్త అనుభూతిని జోడించింది. ఈ పాటకు సరస్వతీపుత్ర రామజోగయ్య శాస్త్రి ఎంతో అర్థవంతమైన, అద్భుతమైన సాహిత్యాన్ని అందించగా.. అర్మాన్ మాలిక్, యామిని ఘంటసాల ఎంతో అందంగా ఆలపించారు.
సితార ఎంటర్‌టైన్‌మెంట్స్, ఫార్చ్యూన్‌ ఫోర్‌ సినిమాస్‌ పతాకాలపై సూర్యదేవర నాగవంశీ, సాయి సౌజన్య ఈ చిత్రాన్ని నిర్మిస్తున్నారు. ఆదికేశవ చిత్రాన్ని శ్రీకర స్టూడియోస్ సమర్పిస్తోంది. శ్రీకాంత్ ఎన్ రెడ్డి ఈ సినిమాతో దర్శకుడిగా పరిచయం అవుతున్నారు. జోజు జార్జ్, అపర్ణా దాస్ ఈ సినిమాతో తెలుగు సినీ రంగ ప్రవేశం చేస్తున్నారు. నవీన్ నూలి ఈ చిత్రానికి ఎడిటర్ గా వ్యవహరిస్తున్నారు. ఆదికేశవ చిత్రం నవంబర్ 10న ప్రపంచ వ్యాప్తంగా విడుదల కానుంది.
