ఐదుగురు వరల్డ్ క్లాస్ ప్లేయర్లు లేకపోయినా భారత్ గెలిచింది.. : మైఖేల్ వాన్
స్వదేశంలో పర్యాటక ఇంగ్లండ్ జట్టుతో జరుగుతున్న టెస్ట్ సిరీస్‌లో ఇప్పటివరకు జరిగిన నాలుగు టెస్ట్ మ్యాచ్‌లలో మూడింటిలో గెలిచింది. దీంతో ఐదు టెస్టా మ్యాచ్‌ల సిరీస్‌ను మరో మ్యాచ్ మిగిలివుండగానే 3-1 తేడాతో కైవసం చేసుకుంది. అయితే, భారత్ క్రికెట్ వరుస విజయాలు, ఇంగ్లండ్ ఆటతీరుపై ఆ జట్టు మాజీ సారథి మైఖేల్ వాన్ స్పందించారు.
"భారత క్రికెట్ జట్టులో వరల్డ్ క్లాస్ ప్లేయర్లు ఐదుగురు లేరు. పైగా ఆ జట్టు టాస్ ఓడిపోయింది. తొలి ఇన్నింగ్స్లో ప్రత్యర్థి కంటే తక్కువ పరుగులు చేసింది. అయినప్పటికీ మ్యాచ్ గెలిచింది" అంటూ కితాబిచ్చాడు. ఈ మ్యాచ్ పూర్తి ఘనత టీమిండియాకే దక్కుతుందన్నారు. ఈ టెస్టు విజయం ఎంతో స్ఫూర్తిదాయకమని అని వాన్ పేర్కొన్నారు. చాలామంది యువ ఆటగాళ్ళు భారత జట్టులోకి వచ్చారని, వారు చాలాకాలం పాట జట్టులో కొనసాగే అవకాశాలు ఉన్నాయని ప్రశంసించారు.
నిజానికి ఏ చిన్న అవకాశం లభించినా భారత్‌పై విరుచుకుపడే మైఖేల్ వాన్ మాత్రం రాంచీ టెస్ట్ మ్యాచ్ ముగిసిన తర్వాత తన అభిప్రాయాన్ని మార్చుకున్నాడు. ఓ దశలో టీమిండియా రెండో ఇన్నింగ్స్లో 120 పరుగుకే ఐదు వికెట్లు కోల్పోగానే వాన్ రెచ్చిపోయాడు. ఇంగ్లండ్ స్పిన్నర్ల దెబ్బకు టీమిండియా బ్యాటర్లు భయపడుతున్నారని వ్యాఖ్యానించారు.
