వివాహితను వేధిస్తున్నాడనీ వ్యక్తిని చంపేశారు.. ఎక్కడ?
ప్రేమించిన యువతికి వివాహమైనప్పటికీ ఆమెను వేధించడంతో ఓ వ్యక్తిని చంపేశారు. ఈ దారుణం తెలంగాణ రాష్ట్రంలోని వరంగల్ జిల్లా వర్ధన్నపేట మండలం, ఉప్పరపల్లి గ్రామంలో జరిగింది. తాజాగా వెలుగులోకి వచ్చిన ఈ వివరాలను పరిశీలిస్తే, వరంగల్ జిల్లా వర్దన్నపేట మండలం ఉప్పరపల్లి గ్రామానికి చెందిన చిన్నపల్లి భాస్కర్ (38) అనే వ్యక్తి అదే గ్రామానికి చెందిన యువతిని గతంలో ప్రేమించాడు. అయితే కుటుంబ సభ్యులు మూడేళ్ల క్రితం వేరే వ్యక్తితో ఆమెకు వివాహం జరిపించారు.
పెళ్లయినప్పటి నుంచి యువతిని భాస్కర్ వేధిస్తున్నాడనే అనుమానంతో దారుణంగా కొట్టి చంపారు. హత్య చేసింది యువతి కుటుంబ సభ్యులేనని మాదాపూర్ పోలీస్ స్టేషన్లో మృతుడి బంధువులు ఫిర్యాదు చేశారు. తమకు న్యాయం చేయాలంటూ స్టేషన్ వద్ద ఆందోళనకు దిగారు.
యువతి తండ్రి రాజు, అతని బావమరిది పోలీసుల ఎదుట లొంగిపోగా, మాదాపూర్ పోలీసులు యువతిని కూడా అదుపులోకి తీసుకుని ప్రశ్నిస్తున్నారు. నిందితులను కఠినంగా శిక్షించాలని కోరుతూ భాస్కర్ కుటుంబ సభ్యులు, ఎమ్మార్పీఎస్ నేతలు ఆందోళనకు దిగారు. దీంతో ఎలాంటి అవాంఛనీయ ఘటనలు చోటు చేసుకోకుండా వర్ధన్నపేట పోలీసులు ఉప్పరపల్లి గ్రామంలో బందోబస్తు ఏర్పాటు చేశారు.

