సోషల్ మీడియాను షేక్ చేసిన 'బచ్పన్ కా ప్యార్' బాలుడికి ప్రమాదం
ఒకపుడు సోషల్ మీడియాను షేక్ చేసిన 'బచ్పన్ కా ప్యార్' అనే పాటతో దేశ వ్యాప్తంగా పాపులర్ అయిన సహదేవ్ అనే బాలుడు రోడ్డు ప్రమాదంలో గాయపడ్డాడు. ఆయన నడుపుతున్న మోటార్ బైక్ అదుపుతప్పి కిందపడిపోవడంతో గాయాలయ్యాయి. దీంతో అతన్ని ఆస్పత్రిలో చేర్చి చికిత్స అందిస్తున్నారు.
ఛత్తీస్‌గఢ్ రాష్ట్రంలోని సుక్మా జిల్లాలో మంగళవారం సాయంత్రం ఈ రోడ్డు ప్రమాదం జరిగింది. సహదేవ్ మోటార్ బైకుపై ప్రయాణిస్తుండగా వాహనం అదుపు తప్పి కిందపడింది. దీంతో సహదేవ్‌తో పాటు ద్విచక్రవాహనాన్ని నడుపుతున్న వ్యక్తికి కూడా గాయాలయ్యాయి. తొలుత సుక్మా జిల్లా ఆస్పత్రికి తరలించారు. అక్కడ ప్రాథమిక చికిత్స తర్వాత మెరుగైన వైద్యం కోసం జగ్‌దల్‌పూర్ వైద్య కాలేజీ ఆస్పత్రిలో అడ్మిట్ చేసి చికిత్స అందిస్తున్నారు.
కాగా, గత 2019లో బచ్పన్ కా ప్యార్ అనే పాటను సహదేవ్ పాడగా ఆ పాటను స్కూల్ టీచర్ ఒకరు వీడియో తీసి సోషల్ మీడియాలో షేర్ చేశారు. దీంతో ఆ పాట వైరల్ అయింది. సోషల్ మీడియాను ఓ ఊపు ఊపింది. దీంతో సహదేవ్ ఒక్కసారిగా దేశ వ్యాప్తంగా గుర్తింపుపొందాడు.
