గుర్రం నేల మీద కూర్చోవడం మీరు ఎప్పుడైనా చూసారా?

గుర్రం అతి వేగంగా పరిగెత్తగల జంతువు. వేగంతో పాటు అనేక కిలోమీటర్ల దూరం పరుగెత్తినా అలసిపోని శక్తి దాని సొంతం. అలాంటి గుర్రం మిగతా జంతువుల్లా నేల మీద ఎందుకు కూర్చోదో మీకు తెలుసా? 

సాధారణంగా ఆవు, మేక, గేదెలాంటి జంతువులు నేల మీద నాలుగు కాళ్లని ముడుచుకుని కూర్చుని సేద తీరడం చూస్తుంటాం. ఏనుగు, ఒంటెలాంటి పెద్ద జంతువులు కూడా అలాగే నేలపై కూర్చుంటాయి. ఈ జంతువులు అలా కూర్చోవడం ద్వారా కాళ్ల కండరాలకు విశ్రాంతిని ఇస్తాయి. కానీ గుర్రం అలా కనిపించదు. 

అందుకు కారణం దాని కాళ్లలోని కండరాలు చాలా బలంగా, దృఢంగా ఉండడమే. గుర్రం నిలబడి ఉన్నప్పుడు, మూడు కాళ్లపైనే ఒకదాని తర్వాత ఒకటి మారుస్తూ దేహాన్ని నిలదొక్కుకోగల సామర్థ్యాన్ని కలిగి ఉంది. కాబట్టి మిగతా జంతువుల మాదిరి కాళ్లు ముడుచుకుని కూర్చోవాల్సిన అవసరం లేదు. గుర్రానికి మరో ప్రత్యేకత ఉంది. అది నిలబడి కూడా నిద్రపోగలదు.