నాటితరం నటుడు ముక్కురాజు మృతి
బ్లాక్‌ అండ్‌ సినిమాల నుంచి అగ్రహీరోలకు నృత్యాలు నేర్పి, వారితోపాటు కలిసి నటించిన ముక్కురాజు గురువారంనాడు కన్నుమూశారు. కొరియోగ్రాఫర్‌గా, నటుడిగా తనదైన బాణిలో రాణించారు. గత కొంతకాలంగా ఆయన అనారోగ్యంతో బాధపడుతున్నారు. గురువారం ఉదయం హైదరాబాద్‌లోని తన ఇంటిలోనే తుదిశ్వాస విడిచారు.
80,90 దశకాలలో పలు చిత్రాలకు పనిచేశారు. 'ఎర్రసైన్యం' వంటి చిత్రాల్లో నటించారు. ఆర్‌. నారాయణమూర్తి చిత్రాల్లో ఎక్కువగా కన్పించేవారు. తాజాగా ఆయన నటించిన చిత్రం '1940లో ఒక గ్రామం'. ఈ చిత్రం పలు అవార్డులకు నోచుకుంది. వృద్ధాప్యం కారణంగా ఆయనకు సరైన అవకాశాలు దక్కలేదు. దీంతో ఇంటిదగ్గరే వుంటున్నారు. సినీప్రముఖులు కొద్ది మంది ఇచ్చే చేయూతతో ఆయన జీవితాన్ని వెళ్ళదీస్తున్నట్లు తెలిసింది. ఆయన మృతి పట్ల సినీరంగ ప్రముఖులు తమ సంతాపాన్ని తెలియజేశారు.
