చైనాలో నాని జెర్సీ.. కలెక్షన్లు కుమ్మేస్తుందా?

ఇండియాలో ఓ మోస్తరుగా ఆడినా, చైనాలో విడుదలై భారీ రాబడులను తెచ్చిపెట్టిన సినిమాలు ఉన్నాయి. సీక్రెట్ సూపర్ స్టార్ అనే చిన్న హిందీ సినిమా ఇండియాలో పెద్దగా ఆడలేదు. కానీ చైనాలో ఏకంగా 600 కోట్లకు పైగా వసూళ్లు రాబట్టింది. అయితే ఈ చిత్రం బడ్జెట్ రూ.50 కోట్లు లోపే. దాని తర్వాత మరో చిత్రం ‘హిందీ మీడియం’ సైతం చైనాలో అనూహ్యంగా ఆడి వందల కోట్లు కొల్లగొట్టడం విశేషం. 

మంచి కంటెంట్ ఉన్న సినిమాలను సరిగ్గా ప్రమోట్ చేసుకుంటే చైనాలో మన సినిమాలకు మంచి డిమాండే ఉంది. బాలీవుడ్ ఫిలిం మేకర్స్ అక్కడి మార్కెట్‌ని విశ్లేషించే ప్రయత్నంలోనే ఉన్నారు. ప్రాంతీయ భాషల సినిమాలు మాత్రం చైనా మార్కెట్‌పై దృష్టిపెట్టడం లేదు. 'బాహుబలి'తో తెలుగు నుండి చైనా మార్కెట్‌ని కొల్లగొడదామనుకున్నా సాధ్యపడలేదు. 

రెండు భాగాల్ని అక్కడ భారీగానే రిలీజ్ చేసారు. కానీ ఫలితం అంతంతమాత్రంగానే ఉంది. వసూళ్లు ఊహించిన స్థాయిలో రాలేదు. వచ్చింది మొత్తం రీలీజ్ ఖర్చులకే అయిపోయింది. బాహుబలి వలనే కానిది మిగతా వాటి వల్ల ఎలా అవుతుందని మిగతా వారు సాహసించడం మానేశారు. ఐతే నానీ నటించిన జెర్సీ సినిమాని చైనాలో కూడా విడుదల చేసే దిశలో అడుగులు వేస్తున్నారు. 

ఈ విషయాన్ని ఇటీవల సూర్యదేవర నాగవంశి కూడా ధృవీకరించారు. ఇండియా సినిమాల్లో భారీతనం ఉట్టిపడే వాటి కంటే ఎమోషనల్‌గా టచ్ చేసే సినిమాలకే చైనాలో ప్రాధాన్యత లభిస్తోంది. సీక్రెట్ సూపర్ స్టార్, హిందీ మీడియం, భజరంగి భాయిజాన్ లాంటి సినిమాలు ఇలాగే విజయం సాధించాయి. మరి జెర్సీ కూడా అక్కడ విజయ పథం వేస్తుందేమో చూడాలి.