భర్త వెన్నెముకకు శస్త్రచికిత్స.. ఆస్పత్రికి ఆటోలో వెళ్ళిన భార్య.. డ్రైవర్ అత్యాచారం
భర్తకు వెన్నెముక దెబ్బతింది. ఇక భార్య ఉద్యోగం చేస్తూ.. ఆస్పత్రిలో భర్త బాగోగులు చూసింది. ఓ రోజు ఆటోలో ఆస్పత్రికి వెళ్దామని ఎక్కింది. ఆ డ్రైవర్ ఆమె వద్ద నీతిమంతుడిలా కనిపించాడు. ఆస్పత్రికి వెళ్లిన ఆటోల
భర్తకు వెన్నెముక దెబ్బతింది. ఇక భార్య ఉద్యోగం చేస్తూ.. ఆస్పత్రిలో భర్త బాగోగులు చూసింది. ఓ రోజు ఆటోలో ఆస్పత్రికి వెళ్దామని ఎక్కింది. ఆ డ్రైవర్ ఆమె వద్ద నీతిమంతుడిలా కనిపించాడు. ఆస్పత్రికి వెళ్లిన ఆటోలోనే తిరిగి ఇంటికి బయల్దేరిన ఆ మహిళపై ఆటో డ్రైవర్ అత్యాచారం చేశాడు. ఈ నెల 14న జరిగిన ఈ ఘటన ఆలస్యంగా వెలుగులోకి వచ్చింది.
వివరాల్లోకి వెళితే.. కొత్తపేట కోమల విలాస్ సెంటర్‌ కొండ ప్రాంతానికి చెందిన భార్యాభర్తలు అట్టపెట్టెల తయారీ కంపెనీల్లో పనిచేస్తున్నారు. కొద్దిరోజుల క్రితం భర్త ఓ ప్రమాదంలో గాయపడ్డాడు. దీంతో ప్రభుత్వాసుపత్రిలో అతనిని భార్య చేర్పించింది. అతడికి వెన్నెముక దెబ్బతిందని వైద్యులు నిర్ధారించి, శస్త్ర చికిత్స చేశారు. ఈ క్రమంలో భార్య పని ముగిశాక భర్త వద్దకు వెళ్లి వచ్చేది.
ఈ నెల 14న ప్రభుత్వాసుపత్రికి వెళ్లడానికి కొత్తపేటలో సిటీ బస్సు ఎక్కి చల్లపల్లి బంగ్లా వద్ద దిగింది. అక్కడి నుంచి ఆసుపత్రికి వెళ్లేందుకు ఆటో కోసం ఎదురు చూస్తుండగా ఒక ఆటో వచ్చి ఆగింది. డ్రైవర్ వివరాలు అడిగి ఆటో ఎక్కించుకుని ఆస్పత్రికి తీసుకెళ్లాడు. తిరిగి ఇంటికి తీసుకెళ్తానని హామీ ఇచ్చాడు. ఆమెతోపాటే భర్త వద్దకు వెళ్లాడు. క్షేమంగా ఇంటి వద్ద దింపుతానని చెప్పాడు. కానీ.. ఇంటికి తిరిగి తీసుకెళ్తూ.. దారి మళ్లించి ఆమెపై అత్యాచారానికి పాల్పడ్డాడు. ఈ ఘటనపై పోలీసులు కేసు నమోదు చేసుకుని దర్యాప్తు జరుపుతున్నారు.
