చంద్రబాబు పాలనలో అవినీతా? పవన్ వ్యాఖ్యలను పాజిటివ్‌గానే!: లోకేష్
ఆంధ్రప్రదేశ్ రాష్ట్రంలో తన తండ్రి, టీడీపీ అధినేత చంద్రబాబు నాయుడు సారథ్యంలోని తెలుగుదేశం ప్రభుత్వ పాలనలో విచ్చలవిడిగా అవినీతి జరుగుతున్నట్టు జనసేన పార్టీ అధినేత, సినీ నటుడు పవన్ కళ్యాణ్ చేసిన వ్యాఖ్యల
ఆంధ్రప్రదేశ్ రాష్ట్రంలో తన తండ్రి, టీడీపీ అధినేత చంద్రబాబు నాయుడు సారథ్యంలోని తెలుగుదేశం ప్రభుత్వ పాలనలో విచ్చలవిడిగా అవినీతి జరుగుతున్నట్టు జనసేన పార్టీ అధినేత, సినీ నటుడు పవన్ కళ్యాణ్ చేసిన వ్యాఖ్యలపై టీడీపీ యువనేత నారా లోకేష్ స్పందించారు. పవన్ వ్యాఖ్యాలను తాము నెగెటివ్‌గా తీసుకోవడం లేదనీ, సానుకూలంగా తీసుకుని లోటుపాట్లు ఉంటే సరిదిద్దుకుందామన్నారు.
ప్రత్యకేహోదా కోసం గురువారం అనంతపురంలో జరిగిన భారీ బహిరంగ సభలో పవన్ మాట్లాడుతూ టీడీపీ పాలనలోని అవినీతిని ప్రస్తావించారు. దీనిపై గురువారం రాత్రి విజయవాడలో జరిగిన కృష్ణా జిల్లా పార్టీ సమన్వయ సమావేశంలో పాల్గొన్న నారా లోకేష్ మాట్లాడుతూ పవన్ కల్యాణ్‌ ఒక పౌరుడిలాగా సలహా ఇచ్చారని... లోటుపాట్లు ఉంటే సరిదిద్దుకుందామన్నారు. ప్రత్యేక హోదాకు అవకాశం లేదని స్పష్టమైన తర్వాతే అందుకు సమానమైన ప్యాకేజీకి ఆమోదం తెలిపామన్నారు. ప్యాకేజీకి చట్టబద్దత కల్పించాలని చంద్రబాబు కూడా గట్టిగా కోరుతున్నారనీ లోకేష్ గుర్తు చేశారు.
