ప్రధానిగా రిషి సునక్ వద్దు... బోరిస్ జాన్సన్
బ్రిటన్ ప్రధానమంత్రి మంత్రి రేసులో ఇన్ఫోసిస్ మాజీ సహ వ్యవస్థాపకుడు నారాయణ మూర్తి అల్లుడు రిషి సునక్ ముందంజలో ఉన్నారు. దీన్ని ఆ దేశ మాజీ ప్రధాని బోరిస్ జాన్సన్ జీర్ణించుకోలేక పోతున్నారు. బ్రిటన్ ప్రధానిగా రిషి సునక్ వద్దని, ఆయన స్థానంలో మరొకరిని ఎన్నుకోవాలని కన్జర్వేటివ్ పార్టీ ఎంపీలకు ఆయన సూచించారు.
అంతేకాకుండా, బ్రిటన్ ప్రధానమంత్రి కోసం జరుగుతున్న ఎన్నికల్లో పోటీలో ఉన్న రిషి సునక్‌కు ఎలాగైనా ఓడించాలన్న పట్టుదలతో బోరిస్ జాన్సన్ అంతర్గతంగా ప్రచారం చేస్తున్నట్టు సమాచారం. సునాక్‌ను తప్ప.. మరెవరినైనా బలపరచండని తన వర్గం ఎంపీలకు జాన్సన్ సూచించినట్టు తెలుస్తోంది.
తనపై అభియోగాలు రావడం, పలువురు మంత్రులు రాజీనామా చేయడంతో అధికార కన్జర్వేటివ్ పార్టీకి చెందిన జాన్సన్ ఈనెల 7న ప్రధాని పదవికి రాజీనామా చేసిన సంగతి తెలిసిందే. అయితే- రిషి తనకు ద్రోహం చేశారని, ఆయన కారణంగానే సొంత పార్టీ నేతలు కూడా తనకు దూరమయ్యారని బోరిస్ ఆగ్రహంతో ఉన్నట్టు చెబుతున్నారు.
తదుపరి ప్రధానిగా ఎవరు ఉండాలన్న విషయంలో తలదూర్చబోనని, బరిలో ఉన్న ఏ అభ్యర్థినీ బలపరచనని జాన్సన్ బహిరంగంగా వెల్లడించినా... సునాక్‌ ఎట్టి పరిస్థితుల్లోనూ ప్రధాని కాకూడదంటూ తన మద్దతుదారులతో ఆయన మంతనాలు సాగిస్తున్నట్టు 'ద టైమ్స్‌' కథనం పేర్కొంది.
