'వకీల్ సాబ్'కు సీక్వెల్ సిద్ధం చేస్తున్నా... వేణు శ్రీరామ్
పవర్ స్టార్ పవన్ కళ్యాణ్ నటించిన చిత్రాల్లో "వకీల్ సాబ్" ఒకటి. సూపర్ హిట్ చిత్రం. గత 2021లో విడుదలైంది. దిల్ రాజు నిర్మాత. బాలీవుడ్ చిత్రం "పింక్"కు ఇది రీమేక్. వేణు శ్రీరామ్ దర్శకుడు. ఇపుడు ఈ చిత్రానికి సీక్వెల్ చేస్తున్నట్టు దర్శకుడు వెల్లడించారు. ఈ చిత్రం విడుదలై రెండేళ్లు అయిన సందర్భంగా దర్శకుడు నెటిజన్లతో తన మనసులోని మాటను వెల్లడించారు.
వకీల్ సాబ్ సీక్వెల్‌కు సంబంధించిన పనులు మొదలయ్యాయని చెప్పారు. ప్రస్తుతం స్క్రిప్ట్‌ వర్క్‌ జరుగుతుందన్నారు. త్వరలోనే దీనికి సంబంధించిన పూర్తి వివరాలు అధికారికంగా ప్రకటిస్తామని చెప్పారు. ఈ అప్‌డేట్‌తో అభిమానులు ఖుష్‌ అవుతున్నారు. ఈ సీక్వెల్‌ను ప్రకటించిన వెంటనే "వకీల్ సాబ్"లోని పాటలు, డైలాగులు నెట్టింట సందడి చేస్తున్నాయి.
బాలీవుడ్ చిత్రం 'పింక్'కు రీమేక్‌గా వచ్చిన ఈ సినిమాతో పవన్ గ్రాండ్‌గా రీ ఎంట్రీ ఇచ్చారు. పవన్ సరసన శ్రుతి హాసన్‌ నటించిన ఈ సినిమాలో అంజలి, అనన్య, నివేదా థామస్‌ కీలక పాత్రల్లో కనిపించారు. మహిళల కోసం పోరాడే న్యాయవాది పాత్రలో పవన్ జీవించారు. ఈ సినిమాలోని కోర్టు సన్నివేశం మొత్తం సినిమాకే హైలెట్‌గా నిలిచింది. ఇప్పుడు దీని సీక్వెల్ ప్రకటించడంతో పవన్‌ను మరోసారి పవర్‌ఫుల్‌గా చూడనున్నామని నెటిజన్లు కామెంట్స్‌ చేస్తున్నారు.
