తెలంగాణ యాస‌తో `త్వ‌ర‌లో వెంకీ పింకీ జంప్`
`ప్రేమ పిలుస్తోంది` చిత్రంతో ద‌ర్శ‌కుడుగా గుర్తింపు తెచ్చుకున్న అజ‌య్ నాతరి ద‌ర్శ‌క‌త్వంలో శ్రీ ల‌క్ష్మీ వెంక‌టేశ్వ‌ర ఫిలింస్ ప‌తాకంపై శ్రీమ‌తి ల‌క్ష్మీరేసు స‌మ‌ర్పణ‌లో వెంక‌ట్ ఆర్ నిర్మిస్తోన్న చిత్రం `త్వ‌ర‌లో వెంకీ పింకీ జంప్`. విక్ర‌మ్, దేవ‌కి ర‌మ్య, హ‌ర్సిత హీరో హీరోయిన్లుగా న‌టిస్తోన్న ఈ చిత్రం ప్రారంభోత్స‌వం ఇటీవ‌ల గ్రాండ్ గా జ‌రిగింది. ఈ కార్య‌క్ర‌మానికి ముఖ్య అతిథులుగా విచ్చేసిన ఆర్థికశాఖ మంత్రి త‌న్నీరు హ‌రీష్ రావు తొలి స‌న్నివేశానికి క్లాప్ నివ్వ‌గా,మెద‌క్ ఎంపీ కొత్త ప్ర‌భాక‌ర్ రెడ్డి కెమెరా స్విచాన్ చేశారు. మున్పిప‌ల్ ఛైర్మ‌న్ రాజ‌న‌ర్సు, క‌ళాంజ‌లి రాజేష్ పూజా కార్య‌క్ర‌మాల్లో పాల్గొన్నారు.
అనంత‌రం మంత్రి హ‌రీష్ రావు మాట్లాడుతూ, పూర్తిగా తెలంగాణ యాస, భాష‌ల‌తో తెలంగాణ క‌ళాకారుల‌తో ఈ చిత్రం రూపొందుతోంది .సిద్దిపేట‌లోనే షూటింగ్ మొత్తం జ‌రుపుకోనుంది. టైటిల్ ఆస‌క్తిక‌రంగా ఉంది. నిర్మాత వెంక‌ట్ కు, ద‌ర్శ‌కుడు అజ‌య్ కు ఈ చిత్రం మంచి పేరు తీసుకరావాల‌ని`` అన్నారు.
నిర్మాత వెంక‌ట్ ఆర్, ద‌ర్శ‌కుడు అజ‌య్ నాతరి మాట్లాడుతూ,``ల‌వ్ అండ్ రొమాంటిక్ ఎంట‌ర్టైన‌ర్ గా ఈ చిత్రాన్ని తెర‌కెక్కిస్తున్నాం. దాదాపు రెండు నెల‌ల పాటు సింగిల్ షెడ్యూల్లో ఈ చిత్రాన్ని సిద్దిపేట ప‌రిస‌ర ప్రాంతాల్లో పూర్తి చేస్తాం``అన్నారు.
