ఆస్తమాను అదుపు చేసే నల్లద్రాక్ష

పండ్లు తింటే ఆరోగ్యానికి మంచిదని మనకు తెలుసు. నల్లద్రాక్షలో మన శరీరానికి కావలసిన పోషకాలు చాలా ఉన్నాయి. ఎన్నో రకాల ఆరోగ్య సమస్యలని నిర్మూలించడంలో ద్రాక్ష పండు ప్రధాన పాత్ర పోషిస్తుంది. అయితే ద్రాక్ష రసం ఆరోగ్యానికే కాక చర్మ సౌందర్యానికి కూడా ఎంతో ఉపయోగపడుతుంది. ఒక గ్లాసు ద్రాక్ష రసం త్రాగడం వల్ల అందమైన, ప్రకాశవంతమై చర్మాన్ని సహజసిద్ధంగా పొందవచ్చు. 

ద్రాక్షలో విటమిన్ సి, ఎ, బి6, ఫోలిక్ ఆమ్లం పుష్కలంగా ఉంటాయి. పొటాషియం, కాల్షియం, ఐరన్, ఫాస్ఫరస్, మెగ్నీషియం, సెలీనియం లాంటి ఎన్నో రకాల ఖనిజ లవణాలు ద్రాక్షలో సమృద్ధిగా లభిస్తాయి. అంతేకాకుండా వీటిలో ఫ్లేవనాయిడ్స్ లాంటి శక్తివంతమైన యాంటి ఆక్సిడెంట్లు ఉండటం వల్ల ఫ్రీరాడికల్స్ బారి నుంచి రక్షిస్తాయి. ఇవి గుండె ఆరోగ్యాన్ని కాపాడతాయి. 

ద్రాక్ష ఆస్తమాను కూడా అదుపులో ఉంచుతుంది. ద్రాక్ష పండ్లలో టీరోస్టిల్‌బీన్ అనే పదార్థం ఉంటుంది. ఇది రక్తంలో కొలెస్ట్రాల్ మోతాదును తగ్గిస్తుంది. ద్రాక్ష పొట్టులో ఉండే సెపోనిన్లు కొలెస్ట్రాల్‌కు అతుక్కుని దాన్ని శరీరం గ్రహించకుండా నివారిస్తాయి. నల్లద్రాక్ష రసం రొమ్ము క్యాన్సర్ నివారణకు ఉపయోగపడుతుందని ఇటీవలి అధ్యయనాలు తెలుపుతున్నాయి. 

క్యాన్సర్ కణాల వ్యాప్తిని కూడా అరికడుతుంది. ద్రాక్షలోని ఈ పదార్థాలు మొత్తం శరీర వ్యాధి నిరోధక వ్యవస్థని బలోపేతం చేస్తాయి. రోజూ ఒక గ్లాసు తాజా ద్రాక్ష రసంను త్రాగడం వల్ల అసిడిటీ తగ్గుతుంది. అజీర్తితో బాధపడేవారు ద్రాక్షను తింటే మంచిది. ద్రాక్షలో ఉండే సెల్యులోజ్, ఆర్గానిక్ ఆసిడ్ మరియు షుగర్ వంటివి మలబద్దకాన్ని నివారించడంలో సహాయపడతాయి.

చర్మ సంరక్షణకు ద్రాక్ష పండ్లు ఎంతగానో ఉపకరిస్తాయి. అందుకే వీటిని స్క్రబ్‌, మాయిశ్చరైజర్‌ తయారీలో ఉపయోగిస్తున్నారు. తాజా ద్రాక్షలను గుజ్జులా చేసి మసాజ్‌ చేసుకుంటే మంచి ఫలితం ఉంటుంది.