రౌడీగారి తమ్ముడు.. కాస్త స్టైల్ మార్చక తప్పదు!
టాలీవుడ్‌లో ఒక్కసారిగా సెన్సేషనల్ అయిపోయి ఆ తర్వాత వరుసగా ఎడాపెడా సినిమాలు చేసేస్తున్న హీరో విజయ్ దేవరకొండ. కాగా... ఆయన తమ్ముడు ఆనంద్ దేవరకొండ 'దొరసాని' చిత్రంతో హీరోగా టాలీవుడ్‌లోకి ఎంట్రీ ఇస్తున్న సంగతి కూడా తెలిసిందే. ఈ సినిమాతో డా.రాజశేఖర్- జీవితల కుమార్తె శివాత్మిక హీరోయిన్‌గా పరిచయం అవుతోంది. ఈ సినిమా జులై 12న విడుదలకు సిద్ధం అవుతున్న నేపథ్యంలో... 'దొరసాని' టీమ్ సినిమాకి సంబంధించిన ప్రమోషన్ కార్యక్రమాల్లో బిజీ బిజీగా ఉన్నారు. ఇందులోభాగంగా సినిమాకి సంబంధించిన లిరికల్ సింగిల్స్ రిలీజ్ చేస్తూ సినిమాపై బజ్ పెంచే ప్రయత్నం కూడా చేస్తున్నారు.
అయితే రీసెంట్‌గా ఈ సినిమాకి సంబంధించిన ఒక లిరికల్ సాంగ్‌ని రిలీజ్ చేసేందుకు హీరో ఆనంద్ దేవరకొండ - హీరోయిన్ శివాత్మికలు ఒక ఎఫ్ ఎం స్టేషన్‌లో సందడి చేసారు. సోషల్ మీడియాలో కూడా ఈ ఫోటోలు వైరల్ కాగా... ఈ ఫోటోలలో ఆనంద్ లుక్స్.. బాడీ లాంగ్వేజ్‌కు నెగెటివ్ రెస్పాన్స్ వస్తోంది.
'దొరసాని' సినిమాలో పాత్ర ప్రకారం ఒక పేదింటి అబ్బాయి లాగా కనపడడం వరకూ సరే కానీ మరీ ప్రమోషన్స్‌లో కూడా ఆనంద్ లుక్స్ ఈ జెనరేషన్‌కు తగ్గట్టుగా లేవనే కామెంట్లే ఎక్కువగా వినిపిస్తున్నాయి. కొంతమంది విజయ్ అభిమానులు కూడా ఆనంద్ తన స్టైల్ మీద.. మేకోవర్ మీద ఫోకస్ చెయ్యాలని.. ఈ విషయాలలో అన్నగారి సలహాలు.. సూచనలు పాటించాలని చెప్తూండటం ఇక్కడ కొసమెరుపు.
నిజానికి విజయ్ దేవరకొండను యూత్‌కి చేరువ చేసిన అంశాలలో స్టైలింగ్ ఒకటి. మరి ఆ అన్నయ్య తమ్ముడు ఆయన దగ్గర ఈ విషయాల్లో సలహాలు తీసుకుంటున్నాడో లేదో..!
