హోలీ ఆడుతున్న చిన్నారిని ఎత్తుకెళ్లి అత్యాచారం.. తర్వాత...
హైదరాబాద్ నగరంలో ఓ కామాంధుడి చేతులో మరో చిన్నారి బలైపోయింది. హోలీ ఆడుతున్న ఆరేళ్ళ బాలికను ఓ మద్యం సేవించిన కామాంధుడు ఎత్తుకెళ్లి అత్యాచారం చేశాడు. ఆ తర్వాత ఆ చిన్నారిని గొంతుపిసికి చంపేశాడు.
తాజాగా వెలుగులోకి వచ్చిన ఈ వివరాలను పరిశీలిస్తే, హైదరాబాద్ సమీపంలోని తుర్కపల్లి గ్రామంలో గురువారం హోలీ వేడుకలు జరిగాయి. తల్లీతండ్రి కూలి పనులకు వెళ్లారు. దీంతో ఆరేళ్ళబాలిక ఒక్కటే ఇంట్లో ఉంటూ, వీధిలో ఇతర చిన్నపిల్లలతో కలిసి హోలీ పండుగ ఆడుతోంది.
ఆ సమయంలో పీకల వరకు మద్యం సేవించిన ఓ కామాంధుడు.. బాలికను ఎత్తుకెళ్లి అత్యాచారం జరిపి చంపేశాడు. ఆ తర్వాత సాయంత్రం ఇంటికి వచ్చిన తల్లిదండ్రులకు కుమార్తె ఇంట్లో కనిపించలేదు. దీంతో ఇరుగుపొరుగువారిని విచారించారు. వారంతా తమకు తెలియదని సమాధానమిచ్చారు.
దీంతో తమ కుమార్తె కనిపించడం లేదంటూ మాయమైనట్టు అల్వాల్‌ పోలీస్‌ స్టేషన్‌లో మిస్సింగ్‌ కేసు వేశారు. విచారణ చేపట్టిన పోలీసులు హైదరాబాద్ శివార్లలో చనిపోయి ఉన్న బాలిక మృతదేహాన్ని గుర్తించారు.
నిందితుడ్ని పట్టుకున్న పోలీసులు అతడిది బిహార్‌లోని పశ్చిమ చంపారన్‌ జిల్లాగా నిర్ధారించారు. నిందితుడిపై ఐపీసీలోని పోక్సో సెక్షన్ ప్రకారం కేసు నమోదు చేసి దర్యాప్తు ప్రారంభించినట్టు సైబరాబాద్‌ పోలీసులు మీడియాకు తెలిపారు.
