ఏపీలో కొత్త జిల్లాల ఏర్పాటు: ఉగాది నుంచి అమలులోకి...?
ఏపీలో కొత్త జిల్లాల ఏర్పాటుపై ప్రభుత్వం దూకుడు పెంచింది. 13 జిల్లాలను 26 జిల్లాలుగా మార్చే ప్రక్రియ వేగవంతం అయ్యింది. త్వరలో అన్ని ప్రక్రియలు పూర్తి చేసి జిల్లాల విభజన ఉగాది నుంచి అమల్లోకి వచ్చేలా కసరత్తు చేస్తున్నారు.
మరోవైపు కొత్త జిల్లాల ఏర్పాటుకు సంబంధించి వచ్చిన సూచనలు, అభ్యంతరాలను రాష్ట్ర స్థాయి కమిటీ రెండు రోజుల్లో పరిశీలించనుంది. మార్చి 3 వరకు గడువు ఉన్నా సరే.. ఈలోపే ఒకట్రెండు సార్లు సూచనలు, అభ్యంతరాలను పరిశీలించాలని నిర్ణయించారు. రాష్ట్ర ప్రణాళికా శాఖ కార్యదర్శి, సీసీఎల్‌ఏ కార్యదర్శి, జిల్లాల కలెక్టర్లు బుధవారం సమావేశం కానున్నారు.
అభ్యంతరాలు, సూచనల్లోని ప్రామాణికత, ఇతర అంశాలను అధ్యయనం చేసి.. చివరిగా వాటిని సీఎస్‌ నేతృత్వంలోని కమిటీకి సిఫారసు చేయనున్నట్లు ప్రణాళికా శాఖ కార్యదర్శి విజయ్‌కుమార్‌ తెలిపారు.
నెల్లూరు, గుంటూరు, తూర్పుగోదావరి జిల్లాల నుంచి ఎక్కువగా సలహాలు, అభ్యంతరాలు వచ్చాయి. వీటిలో అభ్యంతరాలు, ప్రామాణికత ఉన్న సూచనలను పరిశీలించనున్నారు.
