ఒకే ఒక్కడు కుల్దీప్.. ధోనీ అద్భుత స్టింపింగ్.. కివీస్ రెండో వన్డేలో..

Last Updated: శనివారం, 26 జనవరి 2019 (18:27 IST)
కివీస్‌తో జరిగిన రెండో వన్డేలో భారత్ ఘన విజయం సాధించింది. తద్వారా ఐదు వన్డే సిరీస్‌లో భారత్ 2-0 తేడాతో ఆధిక్యంలో నిలిచింది. రెండు వన్డేల్లోనూ భారత బౌలర్లు చెలరేగిపోయారు. టీమిండియా బౌలర్లను ఎదుర్కోవడంలో కివీస్ బ్యాట్స్‌మెన్ విఫలమయ్యారు. ముఖ్యంగా కుల్దీప్ బౌలింగ్‌ను ఆడటంలో చేతులెత్తేశారు. 
 
తొలి వన్డేలో 39 పరుగులిచ్చి నాలుగు వికెట్లు పడగొట్టిన కుల్దీప్ యాదవ్.. రెండో వన్డేలోనూ మెరుగ్గా రాణించాడు. రెండో వన్డేలో 45 పరుగులు ఇచ్చి నాలుగు వికెట్లు పడగొట్టాడు. తద్వారా కివీస్ గడ్డపై వరుసగా రెండు వన్డేల్లో నాలుగేసి వికెట్లు పడగొట్టిన తొలి స్పిన్నర్‌గా కుల్దీప్ రికార్డ్ సృష్టించాడు.
 
ఇక ఈ ఇదే మ్యాచ్‌లో ధోనీ అద్భుత స్టింపింగ్ చేశాడు. కివీస్‌తో జరిగిన రెండో వన్డే 18 ఓవర్ వేసిన జాదవ్... తొలిబంతిని కాస్త తక్కువ వేగంతో విసరడంతో కివీస్ బ్యాట్స్‌మెన్ టేలర్ సరిగ్గా అంచనా వేయలేకపోయాడు. బంతిని కొట్టేద్దామనుకునేలోపే.. ధోనీ చేతిలో బంతి పడటం.. క్షణాల్లో వికెట్ రాలడం జరిగిపోయింది. 
 
టేలర్‌ను అవుట్ చేయడం ద్వారా మహేంద్ర సింగ్ ఖాతాలో 119వ స్టంపింగ్ చేరింది. ఈ క్రమంలో 337 వన్డేలు ఆడిన ధోనీ 311 క్యాచ్ ఔట్లు, 119 స్టంపింగ్‌లు చేశాడు. అత్యధికంగా 520 అంతర్జాతీయ మ్యాచ్‌లు ఆడిన వికెట్ కీపర్ ధోనీయే కావడం విశేషం. దీంతో అత్యుత్తమ వికెట్ కీపర్ల జాబితాలో కుమార సంగక్కర, గిల్ క్రిస్ట్ తర్వాతి స్థానంలో ధోనీ కొనసాగుతున్నాడు. 



దీనిపై మరింత చదవండి :