'దర్బార్' దుమారం : డబ్బులుంటే ఖైదీలు కూడా షాపింగ్‌కు వెళ్లొచ్చు... ఆమెను ఉద్దేశించేనా?
సూపర్ స్టార్ రజినీకాంత్ తాజా చిత్రం దర్బార్. మురుగదాస్ దర్శకత్వంలో వచ్చిన ఈ చిత్రంలో నయనతార, నివేదా థామస్‌లు నటించారు. ఈ చిత్రం గురువారం ప్రపంచ వ్యాప్తంగా రిలీజై పాజిటివ్ టాక్‌ను సొంతం చేసుకుంది. ఫలితంగా కలెక్షన్ల పరంగా కుమ్మేస్తోంది. అయితే, ఈ చిత్రంలోని ఓ డైలాగ్ ఇపుడు తమిళనాట పెను దుమారాన్ని రేపింది. ఆ డైలాగ్ కూడా జయలలిత అక్రమాస్తుల కేసులో జైలుశిక్షను అనుభవిస్తున్న శశికళను ఉద్దేశించినదిగా ఉందంటూ పలువురు ఆమె అనుచరులు రచ్చ చేస్తున్నారు. పైగా, ఈ డైలాగ్‌ను తొలగించాలంటూ వారు ఆందోళనకు దిగారు. దీంతో దర్బార్ చిత్రంలోని ఈ డైలాగ్ ఇపుడు పెద్ద దుమారాన్నే రేపుతోంది.
గురువారం ప్రేక్షకుల ముందుకు వచ్చిన ఈ చిత్రంలో రజినీకాంత్ పోలీస్ ఆఫీసర్ పాత్రలో నటించారు. ఒక సన్నివేశంలో జైలులో ఖైదీ సెల్‌ఫోన్‌లో మాట్లాడుతుంటాడు. అప్పుడు డబ్బులుంటే ఖైదీలు షాపింగ్‌ కూడా వెళ్లొచ్చన్న డైలాగ్ ఉంది. ఆ సన్నివేశంలో ఎక్కడా శశికళ పేరు లేకపోయినా.. అది శశికళను ఉద్దేశించే పెట్టారని అభిప్రాయాలు వ్యక్తమవుతున్నాయి.
మరోవైపు, ఈ చిత్రం కలెక్షన్ల పరంగా దుమ్మురేపుతోంది. ముఖ్యంగా తమిళనాట కనకవర్షం కురిపిస్తోంది. ఫలితంగా సరికొత్త రికార్డులను తిరగరాస్తోంది. అలాగే, తెలుగులో కూడా మంచి కలెక్షన్లనే రాబడుతోంది. ఫలితంగా తొలి రోజున తెలుగు రాష్ట్రాల్లో ఈ సినిమా రూ.7.5 కోట్ల గ్రాస్‌ను .. రూ.4.5 కోట్ల షేర్‌ను సాధించింది. ఇవి చెప్పుకోదగిన వసూళ్లేనని అంటున్నారు. ఓవర్సీస్‌లోను ఈ సినిమా భారీ వసూళ్లనే రాబడుతోంది. తెలుగు వెర్షన్ సంగతి అటుంచితే, తమిళనాట మాత్రం అందరి అంచనాలకు మించి వసూళ్లు రాబడుతోంది.
