Chinmayi: చిన్మయికి గంగై అమరన్ మద్దతు-సార్ ఆలోచించుకోండి.. సీఎం హౌస్ పక్కనే వుంది
2018లో #MeToo ఉద్యమం సమయంలో ప్రముఖ సంగీత దర్శకుడు వైరముత్తుపై గాయని చిన్మయి చేసిన ఆరోపణలు తమిళ చిత్ర పరిశ్రమలో సంచలనం సృష్టించాయి. 2005లో స్విట్జర్లాండ్‌లో జరిగిన "వీళమట్టం" అనే సాంస్కృతిక కార్యక్రమంలో వైరముత్తు తనను వేధించాడని ఆమె పేర్కొంది.
వైరముత్తు ఈ ఆరోపణలను ఖండించినప్పటికీ, చిన్మయి తన వైఖరికి కట్టుబడి, అతని తిరస్కరణలు అబద్ధమని చెప్పింది. మీటూ వేవ్ సమయంలో మాట్లాడిన పరిశ్రమలో మొదటి మహిళలలో చిన్మయి ఒకరు. ఆమె ఆరోపణల ఫలితంగా, చిన్మయిని దక్షిణ భారత సినీ, టెలివిజన్ కళాకారులు, డబ్బింగ్ కళాకారుల సంఘం నుండి బహిష్కరించారు. ఫలితంగా ఆమె తమిళ సినిమా నుండి పూర్తిగా తొలగించబడింది. ఆమె చివరి తమిళ పాట 96 చిత్రంలో ఉంది.
సంవత్సరాలు గడిచినా.. పరిశ్రమలో మద్దతు దాదాపుగా లేదు. అయితే థగ్ లైఫ్‌లో చిన్మయి పాడిన తర్వాత, అభిమానులు సోషల్ మీడియాను సంఘీభావ సందేశాలతో ముంచెత్తారు. ఇది చిన్మయి నష్టం కాదు, తమిళ సినిమా నష్టం అని నెటిజన్లు ఎత్తిచూపారు.
"మీరు చిన్మయి పేరును రద్దు చేయడానికి ప్రయత్నించవచ్చు.. ఆమె గొంతును ఎప్పటికీ నిశ్శబ్ధం చేయలేరు" అని నెటిజన్లు చేసిన పోస్టులు వైరల్ అవుతున్నాయి. ఈ నేపథ్యంలో ఇటీవల చిన్మయి స్వయంగా హాజరైన ఒక కార్యక్రమంలో, సంగీత దర్శకుడు, ప్రముఖ స్వరకర్త ఇళయరాజా సోదరుడు గంగై అమరన్ చిన్మయి వాదనలకు బహిరంగంగా మద్దతు ఇచ్చారు. "అవును, అతను గొప్ప కవి కావచ్చు, కానీ అతను మంచి మనిషి కాదు" అని అమరన్ నిర్మొహమాటంగా వైరముత్తును విమర్శించారు.
వెంటనే స్పందించిన చిన్మయి, "మీరు మాట్లాడే ముందు ఆలోచించండి సార్, ఎందుకంటే ముఖ్యమంత్రి నివాసం దగ్గరలో ఉంది" అని సరదాగా గుసగుసలాడుతూ ప్రేక్షకుల నుండి నవ్వులు పూయించింది. ఈ ఘటనకు సంబంధించిన వీడియో నెట్టింట వైరల్ అవుతోంది.
