ఏపీ మంత్రి గౌతం రెడ్డి మృతి - 'భీమ్లా నాయక్' ప్రిరిలీజ్ ఈవెంట్ రద్దు
ఆంధ్రప్రదేశ్ రాష్ట్ర పరిశ్రమల శాఖామంత్రి మేకపాటి గౌతం రెడ్డి సోమవారం హఠాన్మరణం చెందారు. ఈ మృతికి సంతాపసూచకంగా 'భీమ్లా నాయక్' ప్రిరిలీజ్ ఈవెంట్ వేడుకను రద్దు చేశారు. ఈ నెల 25వ తేదీన ఈ చిత్రం విడుదలకానుంది. దీంతో సోమవారం రాత్రి ఈ చిత్రం ప్రిరిలీజ్ వేడుకను గ్రాండ్‌గా నిర్వహించేలా ప్లాన్ చేశారు. ఇందులోభాగంగా, రాత్రి 8 గంటలకు ఈ చిత్రం ట్రైలర్‌ను రిలీజ్ చేయనున్నట్టు ప్రకటించారు.
కానీ, ఏపీ మంత్రి మేకపాటి గౌతం రెడ్డి సోమవారం గుండెపోటుతో హఠాన్మరణం చెందారు. ఆయన మృతికి సంతాపసూచకంగా ఈ ప్రిరిలీజ్ వేడుకను రద్దు చేస్తున్నట్టు నిర్మాణ సంస్థ సితార ఎంటర్‌టైన్మెంట్ అధినేత నిర్మాత సూర్యదేవర నాగవంశీ వెల్లడించారు. దీంతో పవన్ కళ్యాణ్ అభిమానులు ఒక్కసారిగా షాక్‌కు గురయ్యారు.
కాగా, సాగర్ చంద్ర దర్శకత్వం వహించిన ఈ చిత్రంలో పవన్ కళ్యాణ్ - నిత్యా మీనన్, సంయుక్తా మీనన్‌లతో పాటు విలన్ పాత్రలో దగ్గుబాటి రానా నటించారు. ఈ చిత్రానికి ప్రముఖ దర్శకుడు త్రివిక్రమ్ శ్రీనివాస్ మాటలు, స్క్రీన్ ప్లే అందించడం గమనార్హం.
