రికార్డులను కొల్లగొడుతున్న అల.. వైకుంఠపురములో...
స్టైలిష్ స్టార్ అల్లు అర్జున్ - మాటల మాంత్రికుడు త్రివిక్రమ్ శ్రీనివాస్ కాంబినేషన్‌లో వచ్చిన చిత్రం అల వైకుంఠపురమలో. గత సంక్రాంతి పండుగకు విడుదలై ఇప్పటివరకు ఉన్న నాన్ బాహుబలి రికార్డులను చెరిపేసింది. ఈ చిత్రం విడుదలై ఏడు నెలలు గడిచిపోయినా ఇప్పటికీ రికార్డులు సృష్టిస్తూనే వుంది.
తాజాగా బుల్లితెరపై సరికొత్త రికార్డును నెలకొల్పింది. ఏడు నెలల తర్వాత బుల్లితెరపై ప్రసారమై రికార్డు స్థాయిలో టీఆర్పీ సాధించింది. ఈ చిత్రం ఏకంగా, 29.4 టీఆర్పీ సాధించిన తొలి తెలుగు సినిమాగా నిలిచింది. మీ ప్రేమకు, ఆదరణకు ధన్యవాదాలు అని నాగవంశీ ట్వీట్ చేశారు.
ఇకపోతే, ఈ చిత్రం థియేటర్లలో విడుదలై ఏడు నెలలు. ఓటీటీలో రీలీజై ఆరు నెలలు. అయినప్పటికీ బుల్లితెరపై సరికొత్త టీఆర్పీతో రికార్డు సృష్టించడం గమనార్హం. ఇకపోతే, ఈ చిత్రంలోని పాటల్లో రాములో రాములా, బుట్టబొమ్మ పాటలు సోషల్ మీడియాలో సరికొత్త రికార్డును నెలకొల్పిన విషయం తెల్సిందే.
