మేకప్ వేసుకున్నాం... కానీ, అది చెదరకుండా ఉండాలంటే ఏం చేయాలి..?

షంక్షన్స్‌కి వెళ్లాలని.. మేకప్ వేసుకుంటారు. కానీ, అక్కడికి చేరేలోపు మేకప్ చెదిరిపోతుంది. అలా కాకుండా ఉండాలంటే.. స్పూన్ క్యారెట్ రసంలో కొద్దిగా పన్నీరు, చందనం పొడి చేర్చి ముఖానికి ప్యాక్‌లా వేసుకోవాలి. అరగంట తరువాత గోరువెచ్చని నీటితో ముఖాన్ని శుభ్రం చేసుకుని ఆపై మేకప్ వేసుకుంటే గంటల తరబడీ మేకప్ చెదిరిపోకుండా ఉంటుంది.

రంగు కోల్పోయిన చర్మానికి క్యారెట్ రసం చాలా బాగా ఉపయోగపడుతుంది. రంగును పెంచటమేగాకుండా చర్మ ఆరోగ్యానికి క్యారెట్ రసం మంచిగా తోడ్పడుతుంది. జుట్టు చివర్లు చిట్లినప్పుడు... క్యారెట్ ఆకులకు కొద్దిగా నువ్వుల నూనె కలిపి మెత్తగా నూరి తలకు రాసుకుని పెసరపిండిని తలకు మర్దిస్తూ స్నానం చేసినట్లైతే.. జుట్టు చివర్లు తెగకుండా, జుట్టు నిగనిగలాడుతూ ఉంటుంది.

చర్మం నిగనిగలాడుతూ ఉండేందుకు క్యారెట్‌కు తొక్క తీయకుండా తురిమి ఎండబెట్టాలి. 50 గ్రాము క్యారెట్ ఎండు తురుముకు అంతే సమానంగా కీరాదోస విత్తనాలు, పెసరపప్పు, బార్లీలను పొడి చేసుకోవాలి. ఈ మిశ్రమాన్ని శరీరానికి రాసుకుని స్నానం చేస్తూ ఉంటే చర్మం మంచి రంగులో నిగనిగలాడుతూ ఉంటుంది.

కాసిన్ని బాదంపప్పులను నీటిలో నానబెట్టాలి. ఒక క్యారెట్‌కు తొక్క తీయకుండా ముక్కలు చేసి, వాటికి బాదంపప్పును కలిపి మెత్తగా పేస్ట్‌లా చేసుకోవాలి. ఈ మిశ్రమాన్ని శరీరానికి రాసి అరగంట తరువాత స్నానం చేయాలి. ఇలా పదిహేను రోజులకు ఒకసారి చేస్తే ముడతల చర్మం బిగుతుగా మారుతుంది.