మయామి ఎయిర్‌పోర్టులో ఉద్యోగుల చేతివాటం
విమానాశ్రయాలలో సెక్యూరిటీ చెకింగ్ పకడ్బందీగా జరుగుతుంది. అనుమానాస్పద వస్తువులను ఎయిర్ పోర్ట్ లోపలికి అనుమతించరు. అయితే, ఈ సెక్యూరిటీ చెకింగ్ దగ్గర విమానాశ్రయ సిబ్బంది తమ చేతివాటం ప్రదర్శించారు.
ప్రయాణికుల బ్యాగులు, పర్సుల్లో నుంచి నగదుతో పాటు ఇతరత్రా విలువైన వస్తువులను కొట్టేశారు. అమెరికాలోని మయామి ఎయిర్‌పోర్టులో చోటుచేసుకుంది. ఉద్యోగుల చేతివాటం అక్కడున్న సీసీకెమెరాల్లో రికార్డు కావడంతో ఎయిర్ పోర్ట్ ఉన్నతాధికారులు వెంటనే స్పందించారు.
సదరు ఉద్యోగులు ఇద్దరినీ పోలీసులకు అప్పగించారు. ప్రస్తుతం ఈ దొంగతనానికి సంబంధించిన వీడియో సోషల్ మీడియాలో వైరల్‌గా మారింది.
ఈ ఏడాది జూన్ 29న మయామి ఎయిర్ పోర్ట్‌లో ప్రయాణీకులు తమ లగేజీని సెక్యూరిటీ స్కాన్ కోసం మెషిన్‌పై పెట్టగా.. అక్కడ విధుల్లో ఉద్యోగులు ఓ ప్రయాణికుడి లగేజీలో ఉన్న పర్సులో నుంచి 600 డాలర్లను గోంజాలెజ్, మరో ప్రయాణికుడి లగేజీలో నుంచి విలియమ్స్ నగదును కొట్టేశారు. సీసీ కెమెరాలో రికార్డయిన దృశ్యాలను పరిశీలించగా ఈ దొంగతనం బయటపడింది.
దీంతో గోంజాలెజ్, విలియమ్స్‌ను జులైలో పోలీసులు అరెస్టు చేశారు. వారిని విచారించగా.. డ్యూటీలో ఉన్నప్పుడు ఇలా దొంగతనానికి పాల్పడుతున్నట్లు నిందితులు ఇద్దరూ అంగీకరించారు.
