టైలర్ షర్టు సరిగ్గా కుట్టలేదని.. కత్తెరతో గొంతు కోసి చంపేశాడు
టైలర్ బట్టలను కరెక్ట్‌గా కుట్టివ్వకపోతే.. అరుస్తూ వుంటాం. కానీ ఓ వ్యక్తి టైలర్ కాలర్ సరిగ్గా కుట్టలేదని దారుణంగా హతమార్చాడు. తన షర్టు సరిగా కుట్టలేదనే కోపంతో ఆగ్రహంతో ఊగిపోయిన ఓ వ్యక్తి టైలర్ గొంతు కోసి చంపేసిన ఘటన యూపీలో జరిగింది.
వివరాల్లోకి వెళితే.. రాయ్ బరేలికి చెందిన అబ్దుల్ మజీద్ ఖాన్ అనే 65 ఏళ్ల టైలర్‌కు సలీం అనే వ్యక్తి ఓ షర్టు క్లాత్ ఇచ్చి షర్టు కుట్టమన్నాడు. దానికి సలీం కొలతలు కూడా తీసుకున్నాడు మజీద్ ఖాన్. ఆ తరువాత కొన్ని రోజులకు అంటే గత ఆదివారం (జనవరి 7) రాత్రి షర్టు పట్టుకెళ్లటానికి సలీం వచ్చాడు.
దీంతో తాను కుట్టిన షర్టును సలీంకు ఇచ్చాడు. అక్కడిక్కడే షర్టు ధరించి చూసుకున్నాడు సలీం. కానీ చాలా టైటుగా ఉంది. అదేమని టైలర్ మజీద్ ఖాన్‌పై సలీం ఆగ్రహం వ్యక్తం చేశాడు. నానా దుర్భాషలాడాడు. ఇష్టమొచ్చినట్లుగా తిట్టాడు. అలా ఇద్దరి మధ్యా మాటా మాటా పెరిగింది. అదికాస్తా.. ఘర్షణకు దారి తీసింది.
ఆ ఘర్షణలో టైలర్ అబ్దుల్ మజీద్ ఖాన్‌ను అక్కడే ఉన్న కత్తెరతో గొంతు కోసి చంపేశాడు. నెత్తుటి మడుగులో గిలగిలలాడుతూ మజీద్ ఖాన్ ప్రాణాలు కోల్పోయాడు. దీంతో సలీం అనే వ్యక్తి తన తండ్రిని హత్య చేశాడని టైలర్ కుమారుడు అబ్దుల్ నయీమ్ ఖాన్ పోలీసులకు ఫిర్యాదు చేశాడు. దీనిపై కేసు నమోదు చేసుకున్న పోలీసులు విచారణ చేపట్టారు.
