టాలీవుడ్ 'చందమామ'కు పెళ్లి ఫిక్స్?... వరుడు ఎవరంటే...
తెలుగు వెండితెరకు చందమామ చిత్రం ద్వారా పరిచయమైన హీరోయిన్ కాజల్ అగర్వాల్. ప్రస్తుతం సీనియర్ హీరోయిన్‌గా రాణిస్తోంది. మెగాస్టార్ చిరంజీవి వంటి అగ్రహీరోలతో కలిసి నటించింది. అలాగే, కుర్రకారు హీరోలతోనూ జతకట్టింది. అయితే, ఈ అమ్మడు త్వరలోనే పెళ్లిపీటలెక్కనుంది.
ఆమె పెళ్లికి సంబంధించిన వార్తలు ఇప్పటికే నెట్టింట్లో వైరల్ అయిన విషయం తెలిసిందే. అయితే తాజాగా కాజల్ అగర్వాల్ ముంబైకి చెందిన ఇంటీరియర్‌ డిజైనర్‌, వ్యాపారవేత్తను పెళ్లి చేసుకోబోతున్నట్లుగా ఇప్పటికే వార్తలు వచ్చాయి. తాజాగా కాజల్ పెళ్లాడబోతోన్న వ్యక్తి పేరు కూడా బయటికి వచ్చేసింది.
ఇంటీరియర్‌ డిజైనర్‌, వ్యాపారవేత్త అయిన గౌతమ్‌ కిచ్లుని కాజల్ వివాహం చేసుకోనుందని, ఇప్పటికే అతనితో నిశ్చితార్థం కూడా పూర్తయిందని తాజాగా వార్తలు బయటికి వచ్చాయి. ముంబైలో వీరి వివాహం జరగనుందని వార్తలు చక్కర్లు కొడుతున్నాయి.
అయితే ఇంతకుముందు ఇలాంటి వార్తలు వచ్చినప్పుడు ఎలా అయితే కామ్‌గా ఉందో.. ఇప్పుడు కూడా కాజల్ సైలెంట్‌గానే ఉండటం విశేషం. ప్రస్తుతం స్టార్ హీరోలైన కమల్‌ హాసన్‌, చిరంజీవి వంటి వారి సరసన కాజల్ నటిస్తోంది. చిరంజీవి నటిస్తున్న ఆచార్య చిత్రంలో కాజల్ ప్రధాన హీరోయిన్. అలాగే, దర్శకుడు తేజ కూడా కాజల్‌తో ఓ సినిమా తీయడానికి ప్లాన్ చేస్తున్నారు.
