లైంగిక వేధింపుల కేసులో జానీ మాస్టర్‌కు బెయిల్
లైంగిక వేధింపుల కేసులో ప్రముఖ నృత్య కొరియోగ్రాఫర్ జానీ మాస్టర్‌కు తెలంగాణ హైకోర్టు బెయిల్ మంజూరు చేసింది. దీంతో ఆయనకు భారీ ఊరట లభించినట్టయింది. తనపై జానీ మాస్టర్ లైంగికదాడికి పాల్పడినట్టు తన శిష్యురాలు, మహిళా కొరియోగ్రాఫర్ శృష్టివర్మ హైదరాబాద్ నగర పోలీసులకు ఫిర్యాదు చేసిన విషయం తెల్సిందే. దీంతో గత నెల 16వ తేదీన ఆయనపై నార్సింగి పోలీసులు కేసు నమోదు చేసి అరెస్టు చేసారు.
ఆ తర్వాత ఆయనకు కోర్టు రిమాండ్ విధించడంతో గత నెల రోజులుగా ఆయన చంచల్‌గూడ జైలులో ఉంటున్నారు. జాతీయ అవార్డుల ప్రదానోత్సవం నేపథ్యంలో అక్టోబరు 6 నుంచి 9వ తేదీ వరకు ఆయనకు కోర్టు మధ్యంతర బెయిల్ మంజూరుచేసింది. అయితే, ఆయనకు ఇచ్చిన జాతీయ అవార్డును కేంద్రం రద్దు చేసింది. దీంతో ఆయన మళ్లీ జైలు అధికారుల ఎదుట లొంగిపోయారు.
తాజాగా ఆయన దాఖలు చేసుకున్న బెయిల్ పిటిషన్‌పై విచారణ జరిపిన తెలంగాణ హైకోర్టు... ఆయనకు బెయిల్ మంజూరు చేసింది. దీంతో జానీ మాస్టర్ గురువారం సాయంత్రం చంచల్‌గూడ జైలు నుంచి విడుదలయ్యే అవకాశం ఉంది. జానీ మాస్టర్‌కు బెయిల్ రావడంతో అనేక మంది నృత్య దర్శకులు సంతోషం వ్యక్తం చేస్తున్నారు.
