హీరో నాగార్జున కేసు పెడతానని బెదిరించారు.. సీపీఐ నారాయణ
తెలుగు అగ్ర హీరో నాగార్జున అంటే తనకు ఇష్టమేనని అయితే, తనపై కేసు పెడతానని బెదిరించారని సీపీఐ జాతీయ కార్యదర్శి కె. నారాయణ అన్నారు. అయితే, ఆయన బిగ్ బాస్ కార్యక్రమానికి హోస్ట్ చేయడం నాకు ఏమాత్రం నచ్చలేదన్నారు. ఎందుకంటే అది తన దృష్టిలో ఒక బ్రోతల్ హౌస్ అని చెప్పారు. అందుకే తనపై కేసు పెడతానని బెదిరించారని చెప్పారు.
తాజాగా ఆయన ఓ ఎలక్ట్రానిక్ మీడియాకు ప్రత్యేక ఇంటర్వ్యూ ఇచ్చారు. ఈ సందర్భంగా ఆయన తన మనస్సులోని విషయాలను వెల్లడించారు. బిగ్ బాస్ ప్రోగ్రామ్‌లో ముగ్గురు అమ్మాయిలను పిలిచి ఏ అమ్మాయితో డేటింగ్ చేస్తావు, ఏ అమ్మాయిని ముద్దు పెట్టుకుంటావు. ఏ అమ్మాయిని పెళ్ళి చేసుకుంటావు అంటూ అడుగుతారని, ఆడ పిల్లలను ఇలా మాట్లాడటం సబబేనా అని ప్రశ్నించారు.
అందుకే బిగ్ బాస్ హౌస్ అనేది తన దృష్టిలో బ్రోతల్ హౌస్ అని అన్నారు. ఈ మాట అన్నందుకే నాగార్జున తనపై కేసు పెడతానని హెచ్చరించారని తెలిపారు. పనిలో పనిగా తెలంగాణ సీఎం కేసీఆర్‌పై కూడా విమర్శలు గుప్పించారు. ప్రధాని మోడీని వ్యతిరేకించే బలమైన వ్యక్తుల్లో కేసీఆర్ ఒకరుగా ఉన్నట్టు ప్రజలను నమ్మిస్తారని, నిజానికి ప్రధాని మోడీకి అత్యంత నమ్మకస్తుల్లో సీఎం కేసీఆర్ ఒకరు అని అన్నారు.
