జనవరి 8న నరేంద్ర మోదీ పర్యటన- సర్వం సిద్ధం చేస్తోన్న ఏపీ సర్కారు
విశాఖపట్నంలో జనవరి 8న ప్రధాని నరేంద్ర మోదీ పర్యటించనున్నారు. ఈ సందర్భంగా వివిధ అభివృద్ధి కార్యక్రమాలను ప్రారంభించనున్న నేపథ్యంలో ఆంధ్రప్రదేశ్ ప్రభుత్వం విస్తృత ఏర్పాట్లు చేస్తోంది. ప్రధాని పర్యటన ఏర్పాట్లపై ప్రభుత్వ ప్రధాన కార్యదర్శి కె.విజయానంద్ శుక్రవారం రాష్ట్ర సచివాలయం నుంచి వీడియో కాన్ఫరెన్స్ ద్వారా సంబంధిత శాఖల అధికారులతో సమీక్షించారు.
విశాఖపట్నంలో సౌత్ కోస్ట్ రైల్వే జోన్‌కు ప్రధాని శంకుస్థాపన చేయనున్నారు. అనకాపల్లి జిల్లా పూడిమడకలో ఎన్టీపీసీ ఇంటిగ్రేటెడ్ గ్రీన్ హైడ్రోజన్ హబ్‌కు కూడా ప్రధాని మోదీ శంకుస్థాపన చేయనున్నారు. రాష్ట్ర ప్రభుత్వం అధికారికంగా విడుదల చేసిన ప్రకారం, ఎన్టీపీసీ మూడు దశల్లో ఈ ప్రాజెక్ట్‌లో రూ. 65,370 కోట్లు పెట్టుబడి పెట్టనుంది.
కృష్ణపట్నం ఇండస్ట్రియల్ హబ్‌ను కూడా ప్రధాని వర్చువల్‌గా ప్రారంభిస్తారు. రూ.1,518 కోట్ల విలువైన ఈ ప్రాజెక్టును మొదటి దశలో 2,500 ఎకరాల్లో ఏర్పాటు చేయనున్నారు. ఈ ప్రాజెక్టు ద్వారా దాదాపు 50,000 మందికి ఉపాధి అవకాశాలు లభిస్తాయి.
అదేవిధంగా నక్కపల్లిలో 2,001.8 ఎకరాల విస్తీర్ణంలో రూ.1,876.66 కోట్లతో ఏర్పాటు చేయనున్న బల్క్ డ్రగ్ పార్క్‌కు వర్చువల్‌గా శంకుస్థాపన చేయనున్నారు. ఈ పార్కులో రూ.11,542 కోట్ల పెట్టుబడితో 54,000 మందికి ఉపాధి అవకాశాలు లభిస్తాయి.
