ప్రియురాలితో భర్తకు వివాహం చేయించిన భార్య.. ఎక్కడ?
కట్టుకున్న భర్త.. పరాయి స్త్రీని కన్నెత్తి చూస్తేనే సహించలేని ఈ కాలంలో ఓ మహిళ ఏకంగా తన భర్తకు ఆయన ప్రియురాలితో వివాహం చేయించిందో మహిళ. ఈ ఘటన ఆంధ్రప్రదేశ్ రాష్ట్రంలోని తిరుపతిలో జరిగింది. స్థానికంగా పెద్ద చర్చనీయాంశంగా మారిన ఈ సంఘటన వివరాలను పరిశీలిస్తే,
తిరుపతి పట్టణంలోని అంబేద్కర్ నగరుకు చెందిన ఓ యువకుడు టిక్ టాక్‌లో రాణిస్తున్న సమయంలో విశాఖకు చెందిన యువతితో పరిచయమేర్పడింది. ఆ తర్వాత అది ప్రేమకు దారితీసింది. ఇద్దరూ చనువుగా ఉన్నప్పటికీ కొన్నాళ్ల తర్వాత విడిపోయారు.
అయితే, టిక్‌టాక్‌లోనే కడపకు చెందిన మరో అమ్మాయితో అతనికి పరిచయం ఏర్పడింది. ఈ పరిచయం కూడా ప్రేమగా మారింది. అనంతరం ఇద్దరూ పెద్దలను ఒప్పించి పెళ్లి చేసుకున్నారు.
వీరి కుటుంబం సాఫీగా సాగిపోతుందనుకుంటున్న సమయం విశాఖ అమ్మాయి మళ్లీ లైన్లోకి వచ్చింది. ప్రియుడికి పెళ్లి జరిగిన విషయం తెలుసుకుని ఆమె బాధపడింది. ఆ బాధ నుంచి కోలుకున్న తర్వాత తాను కూడా ఇక్కడే ఉండిపోతానని, ముగ్గురం కలిసి ఉందామని ప్రియుడి భార్యతో చెప్పింది.
ఈ మాట విన్న భార్య ముందు షాక్ తిన్నా.. తర్వాత ముగ్గురూ కలిసి ఉండేందుకు అంగీకరించింది. బుధవారం దగ్గరుండి తానే తన భర్తకు, ఆయన ప్రియురాలికి పెళ్లి జరిపించింది. పెళ్లి కూతురుని కూడా ఆమె స్వయంగా అలంకరించింది. ఈ విషయం తిరుపతిలో చర్చనీయాంశంగా మారింది.
